Ողջո՛յն Սեպտեմբեր. Արձագանքներ «Սփիւռք» Ամառնային Դպրոց 2016»-էն

ՀՀ Սփիւռքի նախարարութեան «Սփիւռք» ամառնային դպրոց 2016» ծրագիրը պատմութեան գիրկը անցաւ  իր անջնջելի տպաւորութիւններով եւ երջանիկ, անմոռանալի յիշողութիւններով: Հայերէնի ուսուցման տեսական եւ գործնական դասերէն բացի, ծրագիրը իսկապէս շատ յագեցած էր հանդիպումներով, մշակութային ձեռնարկներով եւ Հայաստանի տեսարժան ու պատմական վայրերու այցելութիւններով, որոնք հնարաւորութիւն կու տային մասնակիցներուն ծանօթանալու հայ ժողովուրդի նուիրական արժէքներուն ու սրբութիւններուն: Ամէն մէկ հանդիպում, ձեռնարկ եւ այցելութիւն իր արժանի գնահատականնը կը ստանար մասնակիցներուն կողմէ:

Ինծի եւ Քիեւէն ժամանած ուսանողներուն համար շատ հաճելի էր համայն հայութեան հոգեւոր կեդրոն` Մայր Աթոռ Սուրբ Էջմիածին այցելութեան ընթացքին ծրագիրէն դուրս հանդիպումը Նաթան Սրբազանին հետ, որ երկար տարիներ ըլլալով  Հայ Առաքելական Եկեղեցւոյ Ուքրանիոյ թեմի առաջնորդ, ուքրանահայերուն մօտ ձեռք  բերած է անսահման սէր ու յարգանք եւ՜ որպէս Ուքրանիոյ առաջին Սրբազան, եւ՜ որպէս բարեկիրթ ու ստեղծարար անձնաւորութիւն:

Գերաշնորհ տ․ Նաթան արքեպիսկոպոս Յովհաննիսեան հաճոյքով համաձայնեցաւ հանդիպիլ ուսանողներուն հետ եւ տեղեկանալով, որ անոնցմէ շատերը խառն ընտանիքի զաւակներ են ողջոյնէն ետք, բարձր գնահատելով անոնց հայերէն սորվելու ձգտումը, գեղեցիկ հայերէնէն ետք անցաւ սահուն գրական ուքրաներէնի:

Ան նշեց, որ ներկայիս պատերազմող աշխարհի պայմաններուն մէջ մարդկային կեանքի պաշտպանութեան զուգահեռ արդիական ու նշանակալի է հայերէնի ուսուցումը: Ստանալով անոր օրհնութիւնն ու բարեմաղթանքները Մայրենիի ուսուցման դժուարին, բայց կարեւոր գործին մէջ մենք հեռացանք Մայր տաճարէն: Աննկարագրելի էր ուսանողներու ուրախութիւնը, որ միաձուլուած էր հիացմունքին: Իսկ ես հպարտ էի, որ ստացայ այդքան յարգելի հոգեւոր այրի օրհնութիւնը նոր ուսումնական տարուան սկիզբը: Ողջո՛յն Սեպտեմբեր, յոյսով եմ, որ այս տարին եւս կ’ըլլայ հայերէնի ուսուցման բնագաւառին մէջ յաջողութիւններու եւ յաղթանակներու տարի:

Ռուզաննա Մարտիրոսեան

Scroll Up