«Արի Տուն» Ծրագիրին Մասնակցելու Շնորհիւ` Հայերէն Խօսիլ Սորվեցայ.Մոնիքա Շախպանտարեան

ՀՀ սփիւռքի նախարարութեան «Արի տուն» ծրագիրի 2013 թուականի մասնակից, մոսկուաբնակ Մոնիքա Շախպանտարեան, որ Ծաղկաձորի «Արի տուն» ճամբարին մէջ ընդգրկուած էր նախորդ տարիներու մասնակիցներու հաւաք-հանդիպման,«Հայերն այսօր»-ի հետ զրոյցին անկեղծանալով` ըսաւ, որ ծնողներուն հետ ամէն անգամ Հայաստան այցի ժամանակ միայն հարազատներու տուն այցելելէն եւ հիւրասիրութիւններու  մասնակցելէն կը   ձանձրանար:

Հերթական այցելութեան ընթացքին Մոնիքային ձանձրոյթէն փրկած է հեռուստացոյցով «Արի տուն» ծրագիրի մասին տեղեկատուական հոլովակի դիտումը, որմէ յետոյ շատ  ոգեւորուած է եւ ծրագիրին մասնակցելու որոշում կայացուցած:

«Ամենավառ յիշողութիւները  պահպանուած են «Արի տուն» ծրագիրէն: Ծրագիրի ծիրէն ներս  երկու շաբաթը բաւական դարձաւ` նոր ընկերներ ձեռք բերելու, Հայաստանի տեսարժան վայրերով շրջելու համար: Սպանիայէն, Լիբանանէն, Ֆրանսայէն, Անգլիայէն եւ Ռուսաստանէն եկած հասակակիցներուս հետ ջերմ ընկերային կապը մինչեւ հիմա կը պահպանուի: Ծրագիրի աւարտէն յետոյ արդէն չորրորդ տարին է, որ ընկերներու խումբով ամառնային արձակուրդը իրականացնելու համար Հայաստան կու գանք, նոյնիսկ մեր ծնողները, մեծմայրերն ու մեծհայրերը արդէն կը ճանչնան զիրար»,-ըսաւ Մոնիքան:

Պարզ դարձաւ, որ սփիւռքահայ երիտասարդներու հանդիպման վայրը Երեւանը կը դառնայ, ուր կը զբօսնեն փողոցներով եւ կ’այցելեն ժամանցի, պատմամշակութային տարբեր կեդրոններ:

Անոնք պայմանաւորուած են մասնակցելու նաեւ ՀՀ սփիւռքի նախարարութեան  «Սփիւռք»  ամառնային դպրոց ծրագիրին:

Մոնիքան իր կեանքի կարեւոր յաղթանակներէն կը  համարէ «Արի տուն» ծրագիրին մասնակցելու շնորհիւ հայերէն խօսիլ սորվիլը, որուն մասին առանձնայատուկ ոգեւորութեամբ հետեւեալը պատմեց. «Երբ առաջին անգամ Հայաստան եկած էի, գրեթէ չէի խօսիր հայերէն, միայն «բարեւ» եւ «ցտեսութիւն» բառերը գիտէի: Մայրենին սորվելու նպատակով` Մոսկուայի Հայորդաց տան կիրակնօրեայ դպրոցը կը յաճախէի, բայց զգալի արդիւնքի չէի հասած: Վստահ կրնամ ըսել` հայերէն խօսելու օգնեց «Արի տուն»-ը, քանի որ ամէնօրեայ հաղորդակցութեան մէջ կը գտնուէի մարդոց հետ: Հիմա  անձս լիարժէք հայ կը զգամ»:

«Արի տուն» ծրագիրի կայացման եւ յարատեւութեան մէկ ուսանելի արդիւնք եւս. սփիւռքահայ երիտասարդները չեն մոռնար իրենց արմատներն ու հոգիի կանչով` կրկին Հայաստան կու գան:

Պէտք է փաստել, որ ազգանուէր այս ծրագիրը կը նպաստէ նաեւ աշխարհասփիւռ հայորդիներու հայախօսութեան: Ապրելով տարբեր երկիրներու մէջ, առնչուելով տարբեր լեզուներու, մշակոյթի հետ, այնուամենայնիւ, անդաւաճան կը մնան Մայրենիին, իսկ անոնց միաւորողը Հայաստանի շուրջ հէնց հայոց լեզուն կը դառնայ:

Գէորգ Չիչեան

 

Scroll Up