Սփիւռքի Նախարարութեան Առաջարկութեամբ` Լոնտոնահայ Համայնքի Օժանդակութիւնը Փոխանցուեցաւ Վիրաւոր Զինծառայողներուն

«Թէքէեան կեդրոն» հիմնադրամի եւ Թէքէեան Թրաստի նախաձեռնութեամբ` Լոնտոնի հայ համայնքին մէջ կազմակերպուեցաւ դրամահաւաք` օժանդակելու Արցախի ապրիլեան քառօրեայ պատերազմին տուժած հայ զինուորներուն: Այս մասին «Հայերն այսօր»-ին կը յայտնեն «Թէքէեան կեդրոն» հիմնադրամէն:

ՀՀ սփիւռքի նախարարութեան առաջարկութեամբ` հանգանակուած 2,210,000 դրամը յատկացուեցաւ Գեղարքունիքի մարզի 13 վիրաւոր զինծառայողներու` Նորայր Զախարեան /ք. Գաւառ/, Աշոտ Գասպարեան /գիւղ Կարմիր/, Գէորգ Բաղդասարեան /գիւղ Լճափ/, Անդրանիկ Աթալեան /գիւղ Շատջրեկ/, Արմէն Սիմոնեան /ք. Վարդենիս/, Ռուբէն Գէորգեան /գիւղ Փոքր Մասրիկ/, Աւետիս Զարգարեան /գիւղ Սոտք/, Հայկ Մինասեան /ք. Վարդենիս/, Համբարձում Վարդանով /գիւղ Այգուտ/, Գուրգէն Առուստամեան /ք. Ճամբարակ/, Դաւիթ Ազիզեան /գիւղ Վարսեր/, Վահան Սարգսեան /գիւղ Զոլաքար/, Հրայր Բաղդասարեան /գիւղ Լիճք/:

Գեղարքունիքի մարզպետարանին մէջ Յունիս 22-ին կայացած հանդիպումը, որուն ներկայ էին ՀՀ սփիւռքի նախարարութեան աշխատակազմի ղեկավար Ֆիրդուս Զաքարեան, «Թէքէեան կեդրոն» հիմնադրամի տնօրէն Արմէն Ծուլիկեան, վիրաւոր զինծառայողներ եւ ծնողներ, բացուեցաւ մարզպետի` Ռաֆիկ Գրիգորեան, ողջոյնի եւ հերոս-զինուորներու մեծարման խօսքով. «Մեր տղաները փառաւոր սխրանքներ են գործել ռազմադաշտում, իսկ ապրիլեան իրադարձութիւնները համախմբել են մեր ազգը մէկ նպատակի շուրջ, եւ այսուհետ այդ համախմբումը պէտք է ամրապնդուի»: Ան հաւաստիացուց, որ մարզպետարանը հնարաւորութեան սահմաններուն մէջ պիտի շարունակէ օգնել զոհուած եւ վիրաւոր զինծառայողներուն եւ անոնց ընտանիքներուն: Մարզպետը խոստացաւ օգնել նաեւ աշխատանքի տեղաւորման եւ այլ հարցերու մէջ:

ՀՀ սփիւռքի նախարարութեան աշխատակազմի ղեկավար Ֆիրդուս Զաքարեան, շնորհակալութիւն յայտնելով զինծառայողներուն Արցախի եւ Հայաստանի քաղաքացիներու կեանքը եւ առհասարակ Հայրենիքը փրկելու համար, նշեց, որ ապրիլեան դէպքերէն անմիջապէս յետոյ ՀՀ սփիւռքի նախարարութիւնը կոչ ըրած է սփիւռքի կազմակերպութիւններուն` նիւթական օժանդակութիւն յատկացնել տուժած զինծառայողներուն: «Արւում է հնարաւորը, որ այդ օգնութիւնը լինի ոչ թէ միանուագ, այլ շարունակական, որպէսզի իրենց զաւակներին կորցրած ընտանիքները, բուժման ու կենսական խնդիրներ ունեցող վիրաւոր զինծառայողները կարողանան սոցիալական խնդիրներ լուծել, հոգալ իրենց առօրեայ հոգսերը: Կը փորձենք նաեւ անհատական օգնութիւններ կազմակերպել»,-ըսաւ ֆիրդուս Զաքարեան

Այդ կոչին անտարբեր չէր մնացած նաեւ «Թէքէեան կեդրոն» հիմնադրամը, որուն տնօրէն Արմէն Ծուլիկեան հանդիպման եկած էր հանգանակուած գումարով: Դրամական օգնութիւնը յանձնելով Գեղարքունիքի մարզի 13 վիրաւոր զինծառայողներուն, տնօրէնը աւելցուց. «Ապրիլեան քառօրեայ հերոսամարտերը ալեկոծեցին համայն հայութիւնը, եւ մեր տղաներու հերոսական ջանքերուն շնորհիւ մենք այժմ բաց ճակատով կը նայինք աշխարհին եւ կը հաւատանք մեր վաղուան անվտանգ օրուան: Գեղարքունիքի մարզին մէջ  սա մեր առաջին դրամական աջակցութիւնն է, սակայն աշխատանքներ կը տանինք, որ այն ըլլայ շարունակական»:

Հանդիպման աւարտին զինծառայողներն ու ծնողները շնորհակալութիւն յայտնեցին բոլոր սրտցաւ անձանց, բարերարներուն աջակցութեան եւ հոգատարութեան համար:

Scroll Up