Պիտի Շարունակենք Օգնել Հայրենիքին Այնքան, Որքան Ատեն Որ Ատոր Կարիքը Կայ. ՀՕՄ-ի Ատենապետուհի

Հայ օգնութեան միութիւնը 106 տարուան կենսագրութիւն ունի: Այսօր ՀՕՄ-ը ներկայացուցչութիւններ ունի աշխարհի 26 երկիրներու մէջ եւ շուրջ 15.000 անդամ: «Ժողովուրդիս հետ, ժողովուրդիս համար». այս է ՀՕՄ-ի կարգախօսը:

Հայ օգնութեան միութեան կեդրոնական վարչութեան ատենապետուհի Քարոլին Շմաւոնեան օրերս կը մասնակցէր  ՀՀ սփիւռքի նախարարի եւ «Հայաստան» համահայկական հիմնադրամի տեղական մարմիններու անդամներու հանդիպմանը: «Հայերն այսօր»-ին հետ զրոյցին տիկին Շմաւոնեան ներկայացուց վերջին տարիներուն սուրիահայերուն ցուցաբերուած օգնութիւններու ձեռնարկները, ինչպէս նաեւ Արցախին օգնելու համար կազմակերպուած ձեռնարկներն ու ատոնց արդիւնքները:

«ՀՕՄ-ի ջանքերով Սուրիոյ մէջ 50.000-է աւելի ընտանիքներու օգնութիւն կը տրամադրուի, վերջերս ալ Հայաստանի մէջ Նոր տարուան նախօրէին 100 ընտանիքներու նուէրներ բաժնուեցան: Բայց ապրիլեան օրերուն առաջնահերթութիւնը, ի հարկէ, Արցախն էր: ՀՕՄ-ը առաջիններէն էր, որ 50.000 տոլար փոխանցեց Արցախի կառավարութեան: Եւ պիտի շարունակենք այս ծրագիրներն այնքան, որքան Հայրենիքն ու Արցախը մեր կարիքը ունին»,-ըսաւ Քարոլին Շմաւոնեան:

ՀՕՄ-ի ծրագիրները շատ են, սակայն ինչպէս նշեց հայ օգնութեան միութեան կեդրոնական վարչութեան ատենապետուհի Քարոլին Շմաւոնեան, վերջին տարիներուն Ստեփանակերտի Սօսէ մանկապարտէզի վերականգնումը ամենակարեւոր ծրագիրներէն մէկն է, որուն աշխատանքները կ’աւարտեն 2017 թուականին:

 

Scroll Up