Սուրիոյ Մանուկները Կը Մեծնան Առանց Ապրելու Իրենց Մանկութիւնը

Բերիոյ Հայ Կաթողիկէ Եկեղեցւոյ Առաջնորդ` Արհիապատիւ Պետրոս Արքեպիսկոպոս Միրիաթեան, Շաբաթ` 14 Մայիս 2016-ին այցելութիւն տուաւ Ռատիօ Վատիկան եւ այցելութեան ծիրէն ներս հանդիպումներ եւ զրոյցներ ունեցաւ ռատիովատիկանի զանազան խմբագրութիւններուն հետ, իտալերէն, ֆրանսերէն, արաբերէն եւ հայերէն լեզուներով,­ որոնց ընթացքին անդրադարձաւ սուրիացիներուն ու յատկապէս սուրիահայերուն ապրած ողբալից իրավիճակին ու այս առնչութեամբ իր Իտալիոյ մէջ ունեցած հանդիպումներուն եկեղեցական եւ քաղաքացիական բարձրաստիճան անձնաւորութիւններու հետ, ինչպէս նաեւ Ֆրանչիսկոս պապին հետ, որ իրեն վստահեցուցած է աջակցութիւն ցուցաբերել եւ աղօթք բարձրացնել առ Աստուած համայն Սուրիոյ ժողովուրդին համար ու յատկապէս խաղաղութեան հաստատման համար։
Գերապայծառ Միրիաթեան Ռատիովատիկանի ձայնասփիւռէն կոչ ուղղեց խաղաղութեան եւ ապահովութեան հաստատման համար.«Առանց ապահով իրավիճակի հաստատման կարելի չէ յառաջ ընթանալ» ըսաւ ան, ընդգծելով թէ սուրիացի ժողովուրդը այլեւս ապաւինած է միայն Աստուծոյ եւ աղօթքին, որովհետեւ յուսախափ եղած է միջազգային հասարակութեան խոստումներէն եւ յայտարարութիւններէն որոնք ոչ մէկ լուծումի յանգեցան։
Բերիոյ Հայ Կաթողիկէ Առաջնորդը այնուհետեւ ներկայացուց բնակչութեան առօրեայ ողբերգական հոգեվիճակը, սկսեալ մանուկներէն, որոնք կը մեծնան առանց ապրելու իրենց մանկութիւնը, անցնելով տարեցներուն որոնք միայնակ մնացած են այդ տառապեալ եւ յօշոտուած երկրին մէջ, հասնելով այն այրերուն եւ կիներուն, որոնց արժանապատուութիւնը ոտնակոխուած է եւ կը պայքարին իրենց առօրեայ հացը ապահովելու համար։ Մարդիկ, որոնք ժամանակին օգնութեան կը հասնէին կարօտեալին եւ աղքատին եւ այսօր` հինգ տարիներու դաժան պատերազմէն ետք, իրենք կարօտ են օգնութեան եւ օժանդակութեան։
Մեր պահանջը ըսաւ գերապայծառ Միրիաթեան խաղաղութիւն է­, միայն ԽԱՂԱՂՈՒԹԻՒՆ։

Scroll Up