ՀՀ ՍՓԻՒՌՔԻ ՆԱԽԱՐԱՐՈՒԹԻՒՆԸ 5 ՏԱՐԵԿԱՆ Է. ՇՆՈՐՀԱՒՈ՛Ր ՓԱՌԱՒՈՐ ՀՆԳԱՄԵԱԿ…

ՀՀ  սփիւռքի նախարարութիւ՜ն…

Երկրագունդի տարբեր ծագերուն մէջ սփռուած հայութեան համար ահա արդէն  5 տարի հարազատ դարձած ազգային  հրաշալի կառոյց մը,  աշխարհասփիւռ  հայութեան միասնականութեան  համար խիստ կարեւոր նշանակութիւն ու դերակատարում ունեցող, մայր հայրենիքին մէջ գործող պետական   ծանրակշիռ գերատեսչութիւն մը, որուն` յանուն հայութեան  բարի գործոց  համբաւն արդէն
շատոնց տարածուած է  աշխարհով մէկ ու իր հանդէպ մեծ սէր ու մեծ համակրանք, մեծ վստահութիւն  շահած:

Մի քանի օրէն կը լրանայ ՀՀ Սփիւռքի նախարարութեան  5-ամեակը…Կը թուի` դեռ մանուկ է ան… եթէ նայինք տարիքին…Սակայն յայտնի ճշմարտութիւն է, որ կ’ըլլան նաեւ հանճարեղ մանուկներ… Սփիւռքի նախարարութիւնը այդ հանճարեղներէն է… Ընդամէնը 5 տարի, սակայն համարձակ կարելի է ըսել, որ 50 տարուան մէջ ալ գուցէ հնարաւոր չըլլար ընել այն, ինչ  5 տարուան մէջ ըրաւ սփիւռքի նախարարութիւնը` ի դէմս իր տաղանդաշատ ու գործունեայ, բանիմաց ու արհեստավարժ,  մարդկային սիրտեր  կամրջող նախարարի` տիկին Հրանուշ Յակոբեանի…Եւ բոլոր բարի գործերը, որ  իր հիմնադրման առաջին իսկ օրէն նախաձեռնեց ու կարճ ժամանակահատուածի մէջ կենսագործեց  նախարարութիւնը` ՀՀ նախագահ Սերժ Սարգսեանի ու ՀՀ կառավարութեան, վարչապետ Տիգրան Սարգսեանի
աջակցութեամբ, դարձան այն ամուր ու անսասան կամուրջի հիմնաքարերը,  որն այսօր  իրար կը կապէ մայր հայրենիքն ու սփիւռքը…Ու տուն կանչեց, հայրենի տուն կանչեց իր զաւակներուն Սփիւռքի նախարարութիւնը,  ու «Արի տուն» ծրագիրի սրտալի կոչով  5 տարի շարունակ, խումբ առ խումբ հայրենակարօտ երիտասարդներ ու պատանիներ  ահա կու գան Հայաստան,  հայ կը զգան, ուժ կ’առնեն Հայաստանէն, կը ճանչնան  ու կը սիրեն Հայաստանը` իրենց տունը, իրենց վերջին հանգրուանը..

Երիտասարդներէն բացի տարբեր երկիրներ ապրող  ստեղծագործող մտաւորականութեան` գրողներու, լրագրողներու, ճարտարապետներու, նկարիչներու, երգիչ-երգահաններու ուսուցիչներու, բժիշկներու խումբեր կու գան Հայաստան, համաժողովներու կը  հաւաքուին, տարբեր ծրագիրներ կը ներկայացնէ ու կ’իրագործէ Հայաստանի ու արտերկրի մէջ` ի նպաստ հայապահպանութեան…Ու
անոնց բոլորին կը քաջալերէ- կ’ոգեւորէ   ու կ’աջակցի Սփիւռքի նախարարութիւնը..

Եւ ոչ միայն ամենատարբեր այս համահայկական ծրագիրները… Հապա հանդիպումներն ու հրաւէրները՞, հապա անուանի հայերուն տրուած ամենատարբեր գնահատականները՞, որոնք  աւելի կը թեւաւորեն ու լիցքաւորեն մայր հայրենիքէն դուրս ապրող հայերուն…Հապա այն բոլոր նիւթական աջակցութիւնները՞, որ կը տրուին Հայաստանէն դուրս գործող, հայապահպան գործի նուիրեալ կրթօճախներուն,
մշակութային օճախներուն` օգնելու անոնց հայ մնալու, հայ արմատներուն, հայոց ոգին, հայոց համատեղ գործին նուիրուած հայ… Ես  անձամբ ինչպէ՞ս կրնամ շնորհակալ չըլլալ թէ՛ «Կամուրջ» տարեգիրքին  (որուն գլխաւոր  խմբագիրն եմ) տրուող նիւթական աջակցութեան համար, թէ՛ «Վրաստան» թերթին (ուր լրագրող, բաժինի վարիչ կ’աշխատիմ), թէ՛ «Վերնատուն» գրողներու միութեան, որու  վարչութեան անդաներէն եմ…

Հապա «Հայերն այսօր» էլեկտրոնային թերթը՞, որ այսօր հայելին   դարձած է համայն հայութեան կեանքին, անոնց ձեռքբերումներուն ու յաղթանակներուն, ինչու չէ` նաեւ բազում ու բազմապիսի հիմնախնդիրներուն..

Հապա հրատարակուած  արժէքաւոր գիրքերը, տեղեկատու ձեռնարկները, ցեղասպանութեան պատմութեան վերաբերող արժէքաւոր հրատարակութիւնները…

Անհնար  է պարզապէս չտեսնել այս ամէնը..Անհնար է  մարդ ըլլալը, հայ ըլլալը ու չտեսնել ու չուրախանալ..Անհնար է չտեսնել ու չհպարտանալ…Անհնար է սրտի ու հոգիի մէջ չզգալ բոլորիս հարազատ այնքան ու այնքան նուիրուած սփիւռքի նախարարութիւնը` իր բոլոր բաժիններով ու ենթաբաժիններով հանդերձ…Անհնար է չըսել, թէ  ինչ մեծ ուժ է այսօր այս նախարարութիւնը, ինչպէս կը հոգայ վասն հայութեան ու ինչ ջերմ սիրտ ունի ան… Անհնար է չտեսնել այն լոյսը, որն ինչպէս փարոսէն, կու գայ Սփիւռքի նախարարութենէն…Վերջապէս անհնար է  ունենալ սփիւռքի նախարարութիւն եւ  հայ չմնալ, աւելին` եթէ հեռացած ես արմատներէդ, դարձեալ չվերադառնաս  ու վերստին հայ չդառնաս…

Շնորհակալութիւն  ձեզ , նախարարութեան  սիրելի´ աշխատակիցներ…
Շնորհակալութիւն ձեզ, Կովկասի տարածաշրջանի, ի մասնաւորի Վրաստանի հետ կապերու բաժինի  հարազատ աշխատակիցնե´ր…

Շնորհակալութիւն Ձեզ, մեծարգոյ տիկի´ն նախարար, որ հոգիով- սրտով,  Ձեր ողջ էութեամբ նուիրուած էք աշխարհասփիւռ հայութեան ու կը ծառայէք անոր..

Շնորհաւո´ր  փառաւոր  5 –ամեակ. գեղեցիկ տօնդ շնորհաւո´ր..

Յուսալի գալիքը առջեւէ, քանզի ներկան  փայլուն ու հարուստ է, ու սփիւռք-մայր հայրենիք երթեւեկը մշտաշարժ ու մշտանորոգ է:

Խորին յարգանօք, հաւատով ու բարի մաղթանօք`

Անահիտ Բոստանջեան

«Կամուրջ» տարեգիրքի  գլխաւոր խմբագիր եւ համանուն ՀԿ նախագահ, բանաստեղծ,
թարգմանիչ, հրապարակախօս, լրագրող

Վրաստան, Թիֆլիս

 

Scroll Up