Անահիտ Խալաթեան. ՀՀ Սփիւռքի Նախարարութիւնը Եւս Նպաստեց Հայրենադարձուելուս

Հայ երիտասարդները ապրելով Հայաստանէն անդին տարիներու ընթացքին կը հասկնան, որ պէտք է վերջնականապէս իրենց բնօրրանին մէջ հաստատուին եւ սեփական օրինակով ոգեւորեն աշխարհասփիւռ հասակակիցներուն: Անոնցմէ  հայրենադարձութեան ուղին բռնած է Անահիտ Խալաթեանը:

Անահիտը երեք ամիս առաջ Մոսկուայէն Հայաստան  տեղափոփուած է: Պատճառը մէկն էր. Հայաստանէն հեռու ապրիլը այլեւս անհնարին դարձած էր:

-Անահի՛տ,  Ձեր Հայաստան վերադառնալը ի՞նչ նախապատմութիւն ունի:

-Նախ ըսեմ, որ Մոսկուա  տեղափոխուած ենք ընտանիքով 90-ական թուականներուն: 23 տարի ապրելով Մոսկուա` այլեւս չէի կրնար հաշտուիլ այն մտքին հետ, որ Հայաստանէն հեռու կը գտնուիմ: Անընդհատ գլխուս մէջ կը պտտէր հայրենադարձութեան գաղափարը, սակայն չէի յաջողիր իրագործել որոշումս: Կտրուկ որոշում կայացնելէ ետք  վաղեմի երազանքս իրականութիւն դարձուցի: Առջեւս նպատակ  դրած էի հասկնալու համար, թէ սեփական ուժերուս ապաւինելով, ինչ բանի կրնայի հասնիլ:

Արդէն երեք ամիս է` Հայրենիքիս մէջ կը գտնուիմ` իմ տումս: Հայաստան գալով`առաջինը մաքրամաքուր օդը  անյագ շնչեցի: Սա աննկարագրելի զգացողութիւն էր, որ ոչ մէկ բառով չեմ կրնար նկարագրել:

-Իսկ Ձեր ծնողները ինչպէ՞ս արձագանքեցին այս որոշման:

-Ընտանեկան զրոյցներու ժամանակ, երբ կը խօսէի հայրենադարձութեան մասին, անոնք լուրջ չէին վերաբերիր, կը կարծէին` կը կատակէի: Սակայն, երբ հասկցան հարցի լրջութիւնը, ամենեւին չընդդիմացան:

Աւելին ըսեմ, անոնք եւս մտադրուած են վերադառնալ Հայաստան, աշխատանքներ կը տանինք այդ ուղղութեամբ: Հայրս առողջական խնդիրներ ունի, ապաքինուելէ ետք յոյս ունիմ` կը միանան զիս:

-Ինչպէ՞ս կը յաղթահարէք Ձեր առջեւ ծառացած խնդիրները: Չէ՞ որ միայնակ կ’ապրիք այստեղ:

-Այո՛, միայնակ ապրիլը ինքնին խնդիրներու առջեւ կանգնիլ կ’ենթադրէ:Սակայն երբեք չեմ յուսահատիր, քանի որ ես ընտրած եմ այս կենսակերպը:

Հիմնականին մէջ կենցաղային բնոյթի հարցեր կ’առաջանան: Եթէ նոյնիսկ չեմ կրնար ատոնց լուծում տալ, ապա օգնութեան կը կանչեմ ընկերներս.անոնց որեւէ հարցով կրնամ դիմել եւ անպատասխան չմնալ:

Իսկ մարդոց հետ հաղորդակցուելուս լեզուի հետ կապուած որեւէ դժուարութիւն չեմ ունենար, քանի որ լաւ կը տիրապետեմ Մայրենին: Իսկ ընկերական շրջապատ հասցուցած եմ ստեղծել Հայաստան կատարած այցելութիւններուս ժամանակ: Ինծի պէս 30 երիտասարդներ կան, որոնք նոյնպէս տարբեր երկիրներէ հայրենադարձուած են: Կը հաւաքուինք, միասին կը զբօսնենք եւ մեզի յուզող թեմաներու մասին կը զրուցենք:

Մինչեւ Հայաստան գալս ապահով ըլլալու համար լուծեցի նաեւ աշխատանքի հետ կապուած հարցը. այժմ կ’աշխատիմ զբօսաշրջային գործակալութեան մը մէջ:

-Անահի՛տ, Մոսկուայի մէջ ապրելու տարիներուն, ինչո՞վ  զբաղուած էք: Ինչպէ՞ս  կազմակերպած էք առօրեան:

-Յագեցած առօրեայով ապրած եմ: Համագործակցած եմ Մոսկուայի հայ համայնքի, Ռուսաստանի եւ Նոր Նախիջեւանի հայոց թեմի եւ Ռուսաստանի հայերու միութեան հետ: 10 տարի միութեան գործուն անդամներէն էի, ինչպէս նաեւ երեք տարի առաջին փոխնախագահի օգնականն էի: Միութեան մէջ հայապահպանական տարբեր ծրագիրներ կազմակերպած ենք, որուն շնորհիւ ալ աւելի կ’ամրապնդուէր հայրենասիրութիւնս:

Գտնուելով օտարութեան մէջ`շատ կը ցանկայի Հայաստանի մէջ կրթութիւն ստանալ:

Ծնողներս, ընդառաջելով խնդրանքիս, ինծի  քանի մը ամիսով կ’ուղարկէին Հայաստան: Սակայն, ցաւօք սրտի, չյաջողեցայ մինչեւ վերջ յաճախել դպրոց: Ստիպուած ուսումս շարունակեցի Մոսկուայի թիւ 376 դպրոցին մէջ, որմէ ետք  ընդունուեցայ Մոսկուայի Զբօսաշրջութեան ակադեմիա եւ հմտացայ զբօսաշրջութեան համակարգողի մասնագիտութեան մէջ:

-Իսկ Մոսկուայի հայ երիտասարդները որքանո՞վ  կապուած են Հայաստանի հետ:

– Մոսկուայի հայ համայնքը մեծ է եւ բազմաշերտ: Աշխատանքի բերումով ծանօթացած  եմ ոչ միայն Մոսկուայի, այլեւ Ռուսաստանի Դաշնութեան միւս համայնքներուն հետ: Շատ տարբեր են երիտասարդները` իրենց խառնուածքով եւ Հայաստանի վերաբերեալ մօտեցումներով: Կան հայրենասէրներ եւ ոչ այնքան…

Անոնք կը փորձեն ամէն կերպ օգտակար ըլլալ եւ աւանդ ունենալ Հայաստանի զարգացման գործին մէջ: Մոսկուայի հայ համայնքին կից ուսանողական խորհուրդ կը գործէ: Այնտեղ անոնց համար հայապահպանական տարբեր ծրագիրներ կ’իրականացնենք: Ի հարկէ այս հարցով մեծ դեր ունին ընտանիքները, որոնք պէտք է օտարութեան մէջ ապրող իրենց երեխաներուն ամէն կերպ հայեցի դաստիարակութիւն տան:

Անահի՛տ, կարելի է Ձեզի ՀՀ սփիւռքի նախարարութեան վաղեմի բարեկամներէն համարել, որ ազնուօրէն կը մասնակցի նախարարութեան բոլոր ծրագիրներուն: Պատմէ՛ք այս մասին:

– Ստեղծման առաջին օրերէն աշխոյժ  համագործակցութեան մէջ եղած եմ ՀՀ սփիւռքի նախարարութեան հետ: Մասնակցած եմ գրեթէ բոլոր ծրագիրներուն, որոնցմէ գոհ մնացած եմ: Այդ նոյն ծրագիրներուն ժամանակ տարիներու ընթացքին տարբեր երկիրներէ լաւ ընկերներ ձեռք բերի, որոնց  կեանքիս կարեւոր նուաճումը կը համարեմ:

  ՀՀ սփիւռքի նախարարութիւնը եւս նպաստեց հայրենադարձուելուս, որուն համար երախտապարտ եմ: Կը վստահեցնեմ, որ նոյն եռանդով պիտի շարունակեմ համագործակցութիւնս  նախարարութեան հետ արդէն ոչ թէ  սփիւռքահայ, այլ իբրեւ Հայաստանի լիիրաւ քաղաքացի:

Զրուցեց Գէորգ Չիչեան

Scroll Up