«Սփիւռք Ամառնային Դպրոց» Գեղատեսիլ Ծաղկաձորի Մէջ

amarain-debrox-002

Առաջին անգամ մասնակցեցայ «Սփիւռք ամառնային դպրոց» ծրագիրի լրագրողներու դասընթացներուն, որ յագեցած էր հարուստ, հետաքրքիր,  հայրենասիրական եւ մասնագիտական բովանդակութիւն պարունակող բարձր մակարդակի դասախօսութիւններով  ու ձեռնարկներով:

Սփիւռքի նախարարութեան եւ ԵՊՀ կողմէ նախաձեռնած այս հրաշալի ծրագիրը ոչ միայն կարեւոր եւ արդիւնաւէտ միջոց է պահպանելու, ամրապնդելու Հայրենիք-Սփիւռք, Սփիւռք-Սփիւռք կապը, այլ  նաեւ հնարաւորութիւն կու տայ հայրենասիրական ոգով ու հայրենաճանաչութեամբ լեցնելու, հարստացնելու  օտար երկրի մէջ դեգերող սփիւռքահայերուս հոգին` դարձնելով մեզի ալ աւելի համախմբուած ու միասնական, ձեռք բերելու նորանոր գործընկերներ եւ հմտութիւն, վայելելու Ծաղկաձորի մաքուր օդն ու հմայքները:

Հանդիպումները ՀՀ սփիւռքի նախարար Հրանոյշ Յակոբեանի, ԵՊՀ տնօրէն Արամ Սիմոնեանի, ՀՀ սփիւռքի նախարարութեան համահայկական ծրագիրներու վարչութեան պետ Ատոմ Մխիթարեանի, Գիտակրթական ծրագիրներու  բաժնի պետ Սիրավարդ Համբարեանի, մամուլի եւ հասարակայնութեան հետ կապերու վարչութեան պետ Էւելինա Բաղդասարեանի,  ինչպէս նաեւ դասախօսներու, խմբագիրներու, պատմաբաններու, քաղաքագէտներու, ՀՀ հեռուստաընկերութեան լրագրողներու եւ միւս աշխատակիցներու հետ, մեծ վստահութիւն ներշնչեց  ծրագիրի իրագործման եւ արդիւնաւէտութեան հարցի նկատմամբ:

Խորին շնորհակալութիւնս կը յայտնեմ  ծրագիրի բոլոր կազմակերպիչներուն ցանկալով նորանոր յաջողութիւններ:

Յոյսով եմ, որ միասնական ուժերով ժամանակի ընթացքին կը ծաղկեցնենք մեր դրախտային Հայաստանը:

Ամալեայ Իսայեան

Հայաստանի Լրագրողներու միութեան անդամ

Մոսկուա