Եգիպտոսի մէջ հայ գաղթականներու յիշատակը յաւերժացնող յուշակոթող մը բացուած է

Եգիպտոսի  Փորթ Սայիտ քաղաքին մէջ Հոկտեմբեր 16-ին տեղի ունեցած է Մուսա Լերան հերոսամարտէն փրկուած եւ 1915-1919թթ. Եգիպտոսի Փորթ Սայիտ քաղաքին մէջ ապաստանած հայ գաղթականներու յիշատակը յաւերժացնող յուշակոթողի բացման արարողութիւնը: Այս մասին NEWS.am-ի հետ զրոյցին ըսած է Եգիպտոսի Հայ դատի յանձնախումբի անդամ Արմէն Մազլումեան:

Արմէն Մազլումեան տեղեկացուց,  որ յուշակոթողը բացուած է Եգիպտոսի հայ համայնքի նախաձեռնութեամբ,  բացման արարողութեան ներկայ եղած են Եգիպտոսի մէջ Հայաստանի դեսպան Արմէն Մելքոնեան, Մուսա Լերան հերոսամարտի 100-ամեակի յանձնախումբի նախագահ Եսայի Հաւաթեան, Հայ առաքելական եկեղեցւոյ հոգեւոր առաջնորդներ ու հայ համայնքի ներկայացուցիչներ:

«Յուշակոթողի տեղադրմամբ Եգիպտոսի հայ համայնքը Եգիպտոսին եւս մէկ անգամ շնորհակալութիւն յայտնեց հայութեան համար դժուար օրերուն  ապաստան տալու, օգնելու համար»,-ըսաւ Արմէն Մազլումեան:

Եգիպտոսի հայ յանձնախումբի անդամը տեղեկացուց, որ յուշակոթողի բացման արարողութենէն յետոյ տեղի  ունեցած է Հայոց ցեղասպանութեան 1.5 միլիոն անմեղ զոհերու հոգեհանգստայեան արարողութիւն:

Scroll Up