Կայացաւ Սուրիահայերու Համար Աշտարակ Քաղաքին Մէջ §Նոր Հալէպ» Թաղամասի Հիմնադրման Աշխատանքները Համակարգող Յանձնախումբի Նիստը

Օգոստոս 14-ին ՀՀ սփիւռքի նախարարութեան մէջ կայացաւ սուրիահայերու համար Աշտարակ քաղաքին մէջ §Նոր Հալէպ» թաղամասի հիմնադրման աշխատանքները համակարգող յանձնախումբի նիստը:

ՀՀ սփիւռքի նախարար Հրանոյշ Յակոբեան շնորհակալութիւն յայտնեց §Նոր Հալէպ» թաղամասի հիմնադրման աջակցող բոլոր կազմակերպութիւններուն ու անհատներուն, մասնաւորապէս նշեց թաղամասի նախագիծի վրայ աշխատած բոլոր ճարտարապետներուն:

Երեւանի գլխաւոր ճարտարապետ Տիգրան Բարսեղեան ներկայացնելով սուրիահայերու համար Աշտարակի մէջ կառուցուող §Նոր Հալէպ» թաղամասի գլխաւոր յատակագիծը, նշեց, որ առաւել ամբողջական, ներդաշնակ կառուցապատում իրականացնելու համար Աշտարակի մէջ յատկացուած 4,8 հեկտար տարածքը նախագծուած է որպէս քաղաքատիպ թաղամաս` 4-5 յարկանի շէնքերով, կանաչապատուած բակային տարածքներով բնակելի համալիր:

Ճարտարապետներու համահայկական ընկերակցութեան համանախագահ Վահէ Թութունջեան նշեց, որ թաղամասի նախագծման մասնակից ըլլալը լաւ առիթ է, որպէսզի փորձի փոխանակութեան եւ համագործակցութեան հնարաւորութիւն  ունենան Հայաստանի եւ արտասահմանեան մասնագէտները: §Իմ կարծիքով, այս ծրագիրը Հայաստան Սփիւռք գործակցութեան լաւագոյն օրինակ է», – ըսաւ ան:

Արագացուած շինարարութեան հետ կապուած խնդիրներու, նոր տեսակի շինաքարի մասին խօսեցաւ շինաքարի գիւտարար Միքայէլ Համամճեան: Ցուցադրուեցաւ տեսանիւթ նոր շինաքարով կառուցուած տուներու առաւելութիւններուն, մասնաւորապէս, քարի թեթեւութեան, ջերմապահպանման, սեյսմակայունութեան վերաբերեալ:

Ճարտարապետական կոմիտէի նորանշանակ նախագահ Նարեկ Սարգսեան նշեց, որ §Նոր Հալէպ» թաղամասը պիտի ունենայ ճարտարապետական ժամանակակից լուծում, որն իր ոճով ու գեղեցկութեամբ պիտի ըլլայ  ոչ միայն գրաւիչ, այլեւ յարմարաւէտ ու հեռանկարային:

§Սուրիահայերու հիմնախնդիրները համակարգող կեդրոն» հասարակական կազմակերպութեան նախագահ Լենա Հալաճեան խօսեցաւ սուրիահայերէ ստացուող նոր դիմումներու մասին: §Դուրսէն ալ կը դիմեն, Հայաստան հաստատուելու ցանկութիւն  կը յայտնեն » ըսաւ ՀԿ նախագահը:

Ամփոփելով նիստը,  ՀՀ սփիւռքի նախարարը նշեց ժամկէտներ` աշխատանքներու ընթացքը արագացնելու ուղղութեամբ:

Scroll Up