Պէտք է կապերը աւելի սերտանան հայկական գաղութներու եւ հայրենիքի միջեւ. Եգիպտոսի մէջ Հայ դատի յանձնախումբի ղեկավար

Հայոց ցեղասպանութեան 100-րդ տարելիցի յանձնախումբի անդամ եւ Եգիպտոսի մէջ Հայ դատի յանձնախումբի ղեկավար Արմէն Մազլումեան Tert.am-ի հետ զրոյցին կը ներկայացնէ Եգիպտոսի մէջ հայ գաղթօջախի կողմէն Հայոց ցեղասպանութեան ճանաչմանն ուղղուած քայլերն ու գաղութի խնդիրները:

“Պէտք է կապերը աւելի սերտանան հայկական գաղութներու միջեւ եւ հայրենիքի միջեւ: Այդ պարագային  գործակցութիւնը աւելի սերտ կ’ըլլայ եւ արդիւնքը աւելի շօշափելի”,- ըսաւ ան:

Արմէն Մազլումեան կը շեշտէ, որ աշխատանք կը տարուի, եւ յատկապէս Հայոց ցեղասպանութեան տարելիցի ծիրէն ներս անոնք հսկայական են, սակայն կը նշէ, որ պէտք է ջանքերը կրկնապատկուին յատկապէս այդ գաղութներու մէջ, որոնք նօսրացած են, իսկ Եգիպտոս այդ երկրներու շարքին է:

“Կարծեմ` պէտք է հայապահպանութեան մասով Հայաստանը գործուն դեր ունենա, օգնէ մեզի նման գաղութներու մէջ գիրքերու, ուսուցիչներու վերապատրաստման հարցով, որովհետեւ  մեր քով այդ ամէնը պատրաստել քիչ մը դժուար է, ուսուցիչ պատրաստել եւ այլն, այդ հարցերով աւելի մեծ ջանքեր են պէտք”,- ըսաւ ան:

Արմէն Մազլումեան նշեց, որ Եգիպտոսի հայկական գաղութի թիւը դեռ 50-ականներուն 50 000-ի կը հասնէր, անոնք յեղափոխութենէն ետք աստիճանաբար նուազած են եւ հասած 8000-ի: Ըստ անոր` հիմնական հոսքը դէպի Արեւմուտք է:

“Հիմնական պատճառը գոյատեւման խնդիրն է: Բականաբար, ինքզինք կը պահէ, բայց Եգիպտոսի մէջ երթալով այդ թիւը կը նուազի: Բայց դպրոցներ ունինք, մեր ակումբներն ու մշակութային կեդրոնները ունինք, երիտասարդներու եւ պատանիներու երգչախումբ, պարախումբ,  բայց թիւը կը նուազի”,- ըսաւ ան:

Ան նաեւ նշեց, որ քրիստոնեաններու նման արտահոսքը բոլորովին կապ չունի կրօնի հետ:

‘Ընդհանրապէս Եգիպտոսի մէջ հայերը երբեք ալ կրօնական հարց չեն ունեցած, որովհետեւ Եգիպտոս ինք ընդունած է ջարդէն փախած 1915թ-ին հայ գաղթականները: 1915-1919 թթ-ին,  4-5 տարի հայ գաղթականները գոյատեւած են վրաններու մէջ, իսկ իսլամները նուիրատւութիւններ ըրած են անոնց, որ հայերը գոյատեւեն: Այսինքն հակառակ անոր, որ աշխարհի մէջ տեղի ունեցող այս խառնաշփոթին, Եգիպտոսի մէջ կրօնական հարցեր հայ համայնքը չունի, քրիստոնեայ-իսլամ հակամարտութիւնները աւելի շատ Սուրիոյ մէջ է, մեր քով բարիացակամ են, եգիպտացի ժողովուրդն ընդհանրապէս հայերու նկատմամբ, այդ ծայրահեղական մօտեցումը չկայ”,- ըսաւ ան:

Հայոց ցեղասպանութեան 100-րդ տարելիցի յանձնախումբի անդամը անդրադարձաւ նաեւ այս տարուան ընթացքին կատարած մեծածաւալ աշխատանքներուն. “մենք ազատ  կ’աշխատինք եւ Հայոց ցեղասպանութեան հարցերով կ’իրազեկենք եգիպտացի ժողովրդն ու մտաւորականութիւնը: Դժուարութիւն ունէինք արաբերէն լեզուով գրականութիւն ճարել, մենք անոր վրայ ամբողջ տարի աշխատեցանք, եւ հրատարակչական գիրքերով, թարգմանութիւններով հիմա 10 գիրք կայ, եւ 10 գիրք եւս կը պատրաստենք, անոնք կը վերաբերին ոչ միայն Հայոց ցեղասպանութեան, այլ Հայոց պատմութեան եւ հայկական այլ հարցերուն ` ԼՂՀ հիմնախնդիր եւ այլն”,-ըսաւ ան:

Երկրորդ ուղղուածութիւնը ըստ անոր` աշխատանքն էր եգիպտական Լրատուամիջոցներու հետ: “Աւելի շատ հեռատեսիլով փորձած ենք տարածել Հայոց ցեղասպանութեան ու հայերու մասին տեղեկութիւնները եւ ըսեմ, որ կը յաջողինք”,-նշեց ան:

Scroll Up