Հեռահար Հանդիպում «Սփիւռք Ամառնային Դպրոց»-ին Մէջ

Յուլիս 26-ին «Սփիւռք ամառնային դպրոց» ծրագիրի սփիւռքի լրագրողներու դասընթացքի մասնակիցներուն համար հեռահար կապ  հաստատուած էր Լիբանանի «Ազդակ» թերթի եւ «Խօսնակ» պարբերականի գլխաւոր խմբագիրներ Շահան Գանտահարեանի եւ Համբիկ Մարտիրոսեանի հետ:

Ողջունելով ծրագիրի մասնակիցները` «Ազդակ» թերթի գլխաւոր խմբագիր Շահան Գանտահարեան նշեց, որ ուրախ է հայրենիքի մէջ հաւաքուած տեսնել սփիւռքահայ լրագրողներուն, եւ ողջունեց ՀՀ սփիւռքի նախարարութեան նախաձեռնութիւնը, որ համահայկական լրագրողական մարդուժի համախմբման ուղղութեամբ տարբեր ձեռնարկներ կը կազմակերպէ:

Ցեղասպանութեան 100-ամեակին ընդառաջ` Շահան Գանտահարեան կարեւոր համարեց ԶԼՄ-ներու դերը ներազգային եւ արտաքին հանրային կարծիքը ճիշդ կողմնորոշելու ուղղութեամբ:

Նշեց, որ անհրաժեշտ է համահայկական ռազմավարական մեթոտներ եւ հակակշիռ գործողութիւններու ծրագիր մշակել:

«Ազդակի» խմբագիրը լրագրողներու ուշադրութիւնը հրաւիրեց երկու կէտերու վրայ`  ճանաչումէն անցում իրաւական հարթութիւն եւ իրաւական թղթածրարի պատրաստում, որ համահայկական մտածողութիւն ու միասնական մօտեցումներ պէտք է արտայայտէ, միաժամանակ պէտք է յստակեցնել, թէ ինչ կը պահանջենք Թուրքիայէն:

Նշեց, որ մեր պահանջները երեք կէտերու շուրջ պէտք է ծաւալուին` անհատական կալուածներու, նախքան Ցեղասպանութիւնը Օսմանեան կայսրութեան մէջ (Արեւմտեան Հայաստանի) Հայոց եկեղեցւոյ, եկեղեցապատկան կալուածներու հարցը`  կարեւորելով  երկու կաթողիկոսներու յայտարարութիւնը:

Իսկ երրորդը տարածքային խնդիրներու հարցն է:

Այս ուղղութեամբ Շահան Գանտահարեան ողջունեց վերջերս ՀՀ սփիւռքի նախարարութեան նախաձեռնած Հայ իրաւաբաններու համահայկական համաժողովը, որու ուղենիշը Հանրապետութեան նախագահ Սերժ Սարգսեանի ուղերձն էր եւ ՀՀ գլխաւոր դատախազ Աղուան Յովսէփեանի յայտարարութիւնը այն մասին, որ Հայաստանի Հանրապետութիւնը կորսնցուցած տարածքներու վերադարձի խնդիր ունի, ինչ որ  պէտք է հաշուի առնուի իրաւական թղթածրարի պատրաստման ժամանակ:

Իսկ այս հարցերու լուսաբանման ուղղութեամբ մեծ է ինչպէս հայաստանեան, այնպէս ալ սփիւռքեան ԶԼՄ-ներու դերը:

«Խօսնակ» պարբերականի գլխաւոր խմբագիր Համբիկ Մարտիրոսեան եւս ողջունեց ծրագիրի մասնակիցները եւ նոյնպէս կարեւոր համարեց ԶԼՄ-ներու դերը ինչպէս ինքնութեան պահպանման, այնպէս ալ Ցեղասպանութեան վերաբերող խնդիրներուն:

Շեշտեց, որ լրագրողը հայ ժողովուրդի բազկերակն է, եւ տեղեկատուական պայքարին մէջ անոր դերը շատ կարեւոր է:

Համբիկ Մարտիրոսեան անդրադարձաւ նաեւ վերջերս Դաւիթօղլուի ըրած յայտարարութեան եւ նշեց, որ զգօնութիւնը պէտք չէ կորսնցնել եւ անընդհատ հոգեբանական պայքարի մէջ ըլլալ:

Իսկ վերջաւորութեան Համբիկ Մարտիրոսեան իր պատգամը յղեց սփիւռքահայ լրագրողներուն, այն որ` ունենալ սեփական կարծիք, միաժամանակ յարգել զրուցակիցի կարծիքը, լրագրողական սեփական ոճ, ըլլալ արդարադատ, շրջահայեաց եւ պատրաստուած` չդաւաճանելով բարոյական բարձր սկզբունքները:

Լուսինէ Աբրահամեան,  Ծաղկաձոր

Scroll Up