Ռէյիսեան. «Չենք Ցանկար, Որ Գաղութը Ամայանայ, Բայց…»

Սուրիոյ հայ համայնքի ղեկավարները չեն խոչընդոտեր, որ  սուրիահայերը լքեն Սուրիան», 168.am-ի հետ զրոյցի մը ընթացքին ըսաւ Բերիոյ թեմի մամլոյ բանբեր Ժիրայր Ռէյիսեան` անդրադառնալով մամուլին մէջ շրջանառուող խօսակցութիւններուն, թէ Հայաստանի Հանրապետութեան  բարձրաստիճան պաշտօնեաներուն` Դամասկոս կատարած այցելութեան ընթացքին առաջնորդարանին պատճառով չէ քննարկուած տեղափոխման հարցը այն սուրիահայերուն, որոնք կը ցանկան լքել Սուրիան: Պատասխանելով այն հարցումին, թէ ինչո՞ւ հայ համայնքի ղեկավարները կը խոչընդոտեն սուրիահայերուն` Հայաստան վերադառնալու հոլովոյթը, Ռէյիսեան պատասխանեց, թէ նման որակումներ տալը սխալ է:

Ան տեղեկացուց, որ Դամասկոսի մէջ հայ պաշտօնեաներուն եւ հայ համայնքի ներկայացուցիչներուն հանդիպման անձամբ ներկայ գտնուած է, ուր Հայաստանի Հանրապետութեան արտաքին գործոց նախարարը, դեսպանը առաջարկած են համայնքի ներկայացուցիչներուն ներկայացնել իրենց խնդիրները, մտահոգութիւններն ու առաջարկները, եղած են հարցումներ, որոնք բոլորն ալ սպառիչ պատասխաններ ստացած են:

«Իսկ հիասթափուող մարդոց չեմ հասկնար, եթէ անոնք հարց չեն բարձրացներ: Փոխանակ հիասթափուին, թող հարցեր բարձրացնեն եւ  ստանան պատասխաններ, աջակցութիւն»,- ըսաւ Ռէյիսեան: Վերջինս նշեց, որ համայնքի ոեւէ ներկայացուցիչի անձնական ցանկութիւնը հաւաքական ցանկութիւն չէ, եւ պէտք չէ ըսել, թէ բոլորը կը ցանկան  հեռանալ:

«Կան մարդիկ, որոնք կը ցանկան հեռանալ, կան մարդիկ, որոնք կը ցանկան մնալ: Այս ամէնը հաւաքական տրամադրութիւն չէ: Իսկ առաջնորդարանի դերակատարութեան մասին խօսիլը, կը կարծեմ, որ սխալ է: Առաջնորդարանը, Ազգային իշխանութիւնը, պատասխանատու բոլոր կողմերը կը խորհին, որ այն մարդիկ, որոնք Սուրիայէն դուրս գալ կը ցանկան, երթան հայրենիք: Բնականաբար, մենք չենք ցանկար, որ  գաղութը լուծարուի, ամայանայ, բայց դէմ չենք կրնար ըլլալ, եթէ  մարդիկ որոշած են հեռանալ, խորհուրդ կու տանք երթալ հայրենիք», -ըսաւ Ռէյիսեան:

«Ազդակ»

Scroll Up