Այնճարի Հայ Կաթողիկէ Վերանորոգուած Եկեղեցւոյ Օծում

Մայիս 19-ին, Այնճար ժամանեց հայ կաթողիկէ համայնքի Ներսէս Պետրոս ԺԹ. պատրիարքը` կատարելու համար Այնճարի հայ կաթողիկէ վերանորոգուած եկեղեցւոյ խորանի օծումն ու պաշտօնական բացումը: Հոգեւոր տիրոջ կ՛ընկերանար բազմանդամ պատուիրակութիւն մը, մինչ Այնճար ժամանած էին նախկին նախարարներ, Մեծի Տանն Կիլիկիոյ կաթողիկոսութեան ներկայացուցիչը, Հայաստանի դեսպանութեան հիւպատոսը, Սուրիոյ մէջ Հայաստանի դեսպանը, ՀՅԴ Լիբանանի Կեդրոնական կոմիտէն ներկայացնող անդամ մը, բազմաթիւ միութիւններու եւ քոյր համայնքներու ներկայացուցիչներ, ինչպէս նաեւ մեծաթիւ հաւատացեալներ: Ներկայ էին նաեւ Այնճարի հոգեւոր պետերը, քաղաքապետը, ՀՅԴ «Կարմիր լեռ» կոմիտէի ներկայացուցիչը, ինչպէս նաեւ մեծաթիւ այնճարցիներ:

Եկեղեցւոյ մուտքին ամենապատիւ հոգեւոր տէրը եւ պաշտօնական հիւրերը դիմաւորուեցան աղ ու հացով եւ ՀՄԸՄ-ի Այնճարի շեփորախումբի խանդավառ կատարումներով: Հոգեւոր տէրը եւ պաշտօնական հիւրերը ուղուեցան դէպի ամբողջութեամբ վերանորոգուած Այնճարի հայ կաթողիկէ եկեղեցի. անոնց ի պատիւ կանգնած էին Այնճարի ՀՄԸՄ-ի տարազաւորները:

Հոգեւոր տիրոջ խօսքէն ետք խօսք առաւ Այնճարի հայ կաթողիկէ համայնքի ժողովրդապետ հայր Մեսրոպ վրդ. Թոփալեան, որմէ ետք տեղի ունեցաւ խորանի օծումը: Եկեղեցւոյ գլխաւոր բարերար Գրիգոր Ճապուրեան պարգեւատրուեցաւ Պենետիկտոս ԺԶ. սրբազան քահանայապետին «Ս. Գրիգոր Մեծի ասպետ»  շքանշանով` ձեռամբ հայ կաթողիկէ հոգեւոր տիրոջ:

Եկեղեցական արարողութիւններէն ետք տեղի ունեցաւ նուագահանդէս մը, որուն ընթացքին ելոյթ ունեցաւ միջազգային ճանաչում ունեցող սրնգահար եւ տուտուկահար Համբարձում Ճապուրեան` ընկերակցութեամբ խումբ մը նուագողներու:

Եկեղեցիէն դուրս գալով հոգեւոր տէրն ու ժողովրդապետը, ինչպէս նաեւ բարերարը` ճերմակ աղաւնիներ թռցուցին երկինք` ի նշան խաղաղութեան: Աւարտին ընդունեցին ներկաներուն շնորհաւորութիւնները եւ տեղի ունեցաւ հիւրասիրութիւն: Յայտնենք, որ ժողովուրդին մեծ մասը արարողութեանց հետեւեցաւ դուրսը զետեղուած պաստառի մը միջոցով, նկատի ունենալով, որ եկեղեցին նեղ կու գար հաւատացեալներուն: Յայտնենք նաեւ, որ եկեղեցւոյ վերանորոգումի ճարտարապետն է Վազգէն Նիւրբեթլեան, քանդակագործը` Պօղոս Թասլաքեան (Աղասի), իսկ եկեղեցւոյ սրբանկարները գեղանկարիչ Գրիգոր Սգայեանի գործերն են:

«Ազդակ»

gatoghige2-300x200

Scroll Up