Սիպիլ. «Սիրով զինված՝ ճամփա ելա…»

Փետրվարի 11-ին պոլսահայ սիրված երգչուհի Սիպիլը (Սիպիլ Փեքթորոսօղլու) հանդիսատեսին կներկայանա իր նոր՝ «Սեր» (LOVE) ձայնասկավառակով:

Սիրո, ալբոմում ընդգրկված երգերի շուրջ է «Հայերն այսօրի» հարցազրույցը սիրված երգչուհու հետ:

– Սիրելի´ Սիպիլ, մեր վերջին հանդիպման ժամանակ ասացիր, որ աշխատում ես քո նոր ձայնասկավառակի վրա և որ՝ «Սիպիլին սիրողներն ինչպես Հայաստանում, այնպես էլ ամբողջ աշխարհում, շատ պետք է ուրախանան»:

Այսօր հերթական երազանքդ իրականություն դարձավ. թողարկվել է քո երկրորդ ալբոմը: Այն վերնագրված է «Սեր»: Ինչո՞ւ Սեր և այդ Սերն ո՞ւմ է ուղղված:

-Աառաջին ալբոմս իմ մանկության երազանքն էր. ամեն ինչ այդ երազանքի իրականացման որոշումը տալուց հետո պատահեց: Շատ մեծ անակնկալներ, երջանիկ պահեր, նկատելի հրաշք դեպքեր ապրեցի:

Իսկ երկրորդ ալբոմի թողարկումն ինձ համար շատ ավելի պատասխանատու էր, որովհետև այն միայն Սիպիլինը չէր լինելու: Այն Սիպիլին հոգով, սրտով սիրող, նրա կողքին կանգած, նրա համար աղոթող, բարին մաղթող բոլոր մարդկանց երազանքը պետք է լիներ:

Ալբոմիս անունը ցանկացա «Սեր» կոչել, որովհետև աշխարհի ամենալավ, ամենաուժեղ զգացումն է սերը. Սիրո մասին շատ պատմություններ, երգեր են գրվել: Ես ալբոմս մեկ անձի համար «Սեր» չկոչեցի: Ցանկացա, որ այն սեր բերի բոլոր մարդկանց՝ անկախ մաշկի գույնից, կրոնից և ազգային պատկանելությունից…

– Սիպի´լ ջան, քեզ ճանաչելով՝ այս պահին պատկերացնում եմ քո ապրումները, հույզերը: Կցանկանայի, որ մեր ընթերցողների հետ կիսեիր քո զգացողությունները…

– Կարող եմ ասել, որ շուրջ յոթ ամիս այս ալբոմով կապրիմ՝ կը քնիմ ու կարթըննամ: Այս յոթ ամիսների ընթացքում շատ անքուն օրեր եմ անցկացրել, շատ մեծ հուզմունքներ եմ ապրել, բայց կարծում եմ, որ արժեր ամեն մեկ  հոգնությունս: Անհամբեր կը սպասեմ ժողովրդի արձագանքին:

– Ինչո՞վ են տարբերվում «Սիպիլ» և «Սեր» ալբոմները: Հետաքրքիր է` Հայաստանում շնորհանդես կլինի՞:

– Ժանրը նույնն է, բայց իմ կարծիքով՝ առաջինը շատ ավելի տարբեր ալբոմ եղավ: «Սիպիլ» ալբոմի համեմատությամբ՝ ավելի ռիթմիկ երգեր, սիմֆոնիկ գործիքավորումներ, իրարից արժեքավոր մասնակիցներ և արամեերեն լեզով երգ մը կա, որը Հիսուս Քրիստոսի լեզուն է:

Իսկ Հայաստանում շնորհանդես կազմակերպել շատ կցանկանամ: Հուսով եմ՝ շուտով կիրականանա փափագս:

–  Խնդրում եմ՝ մի փոքր պատմես ալբոմում ընդգրկված երգերի մասին: Ինչպե՞ս է կատարվել ընտրությունը, և ի՞նչ ես ցանկացել այդ երգերով փոխանցել աշխարհով մեկ սփռված քո հանդիսատեսին:

– «Սեր» ալբոմը բաղկացած է 12 երգերից, 8-ը՝ նոր երգեր են, մեկ երգ ռեմիքս տարբերակով է, երեքն էլ հին, բայց անմոռանալի, ժողովրդի կողմից շատ սիրված երգեր են: Վեց նոր երգերի հեղինակը Մաժակ Թոշիկյանն է: Նոր երգերի համար հրաշալի խոսքեր են գրել Մաքրուհի Հակոբյանը («Մարմարա» օրաթերթի փոխխմբագրապետ-հեղ.), Ավետ Բարսեղյանը, Արթուր Սաֆարյանը: Մեկ երգի հորինումը կը պատկանի շատ սիրելի Արա Գևորգյանին, այդ գեղեցիկ մեղեդիի համար Ավետ Բարսեղյանը նոր խոսքեր գրեց:

Հին երգերից ցանկացա ալբոմիս մեջ ընդգրկել «Ադանայի ողբը», «Բարի Արագիլը» և Լևոն Աբրահամյանի «Տարիներ, տարիներ»-ը: Պարոն Լևոնը սիրով ընդունեց իմ փափագը, ես էլ շատ մեծ սիրով երգեցի իր ստեղծագործությունը:

–  Ալբոմում ընդգրկված են Մաժակ Թոշիկյանի նոր մեղեդիները: Հաճելի է, որ համագործակցությունը ճանաչված երգահանի հետ շարունակվում է:

– Մաժակ Թոշիկյանը առաջին իսկ օրից ինձ իսկական եղբոր գուրգուրանքով մոտեցավ: Տեսավ սրտիս մեջ պարփակված երաժշտության հանդեպ սերը: Առաջին ալբոմիս մեջ միայն «Նամակ» երգի երաժշտությունն էր ինձ համար հորինել, որը մեծ արձագանք ունեցավ: «Սեր» ալբոմում նա ինձ համար վեց երգ է գրել, որը շատ կարևոր է ինձ համար: Նա ինձ շատ լավ է ճանաչում, ձայնիս գույնը, ժանրս շատ լավ գիտե: Հուսամ, որ այս նոր երգերը շատ պիտի սիրեք:

– Քո համագործակցությունը Անդրեի հետ բոլորիս է հայտնի: Նորություն է Ջիվան Գասպարյանի, Արա Գրորգյանի, ինչպես նաև «Արևներ» մանկական երգչախմբի  հետ համագործակցությունը: Ինչպե՞ս ստացվեց այդ ամենը:

– Լուսինե´ ջան, շատ լավ պիտի հիշես, որ անցյալ տարի հունիս ամսին Հայաստան էի այցելել: Այդ ընթացքում ծանոթացա պարոն Ջիվան Գասպարյանի հետ: Նա ընդունեց իրեն տեսնելու առաջարկս և հրավիրեց իր տուն: Ալբոմիս մասին տեղեկությւն տվի նրան: Շատ կը փափագեի, որ մաս կազմեր ալբոմիս, մասնավորաբար՝ իմ շատ սիրելի «Ադանայի ողբը» երգին մասնակից լիներ իր դուդուկով: Սիրով ընդունեց և ասաց՝ պատրաստ եմ քեզ օգնելու, և քանի հատ երգ ուզես՝ կնվագեմ: Գնահատեց Թուրքիայի մեջ ապրելով՝ ջանք թափած գործերիս համար: Ո´ղջ ըլլա: Ինձ համար իսկապես շատ մեծ պատիվ է, որ Ջիվան Գասպարյանի նման աշխարհահռչակ երաժիշտը տեղ է գրավել իմ ալբոմում:

Իմ շատ սիրելի Արա Գևորգյանի հետ Համահայկական խաղերի ժամանակ էի ծանոթացել և մտերմացել: Նրա շատ մեծ համակիրներից մեկն եմ: Բնականաբար, փափագում էի, որ ալբոմիս մեջ նրա երաժշտությունը ևս տեղ գտնի: Շատ մեծ սիրով ընդունեց և ասաց՝ ո´ր երաժշտությունս փափագես, կարող ես գործածել: «Արմավիր» երաժշտության համար սիրելի Ավետ Բարսեղյանը մեկ օրում շատ լավ խոսքեր գրեց, և Անդրեի հետ զուգերգով երգեցինք:

Ալբոմիս մեջ «Արևներ» երգչախմբի մաս կազմելու համար պարտական եմ Արա Գևորգյանին: Իմ կողմից զանգեց լուսահոգի Արմեն Դիվանյանին և հայտնեց իմ փափագս: Պարոն Արմենը շուտով ընդունեց ինձ: Բայց մեր համագործակցությունը ընդհատեց նրա անժամանակ մահը: Ես ալ ցանկացա   Մաժակ Թոշիկյանի երաժշտությամբ և Արթուր Սաֆարյանի հիասքանչ բառերով «Ավետյաց երկիր» երգը նվիրել Արմեն Դիվանյանի հիշատակին:

– Սիպի´լ ջան, անցյալ տարի Ստամբուլի «TIM Show Center» համերգասրահում Անդրեի հետ կայացած համերգի ժամանակ տեղի ունեցավ Հովհաննես Շիրազի խոսքերով և Մաժակ Թոշիկյանի երաժշտությամբ գրված «Քո հայրենիք» երգի պրեմիերան: Ալբոմում այդ երգը քեզ հետ միասին կատարում են հայաստանյան մի շարք երգիչներ (Զարուհի Բաբայան, Արսեն Սաֆարյան, Անդրե, Արսեն Գրիգորյան, Ալլա Լևոնյան, Էրիկ, Սոֆի Մխեյան, Հասմիկ Կարապետյան, Մհեր, Աննա Խաչատրյան, Սյուզան Մարգարյան, Վարդան Բադալյան, Ինգա, Անուշ Արշակյաններ, Լեյլա Սարիբեկյան):

Ո՞ւմ գաղափարն ու նախաձեռնությունն էր դա:

– Ալբոմիս պատրաստության ընթացքում միշտ կապի մեջ էի Անդրեի հետ: «Քո հայրենիքը» մեզ համար հատուկ երգ էր, քանի որ այն առաջին անգամ հնչել էր մեր Պոլսո համերգի ընթացքում: Այս երգի մասին խոսելու ընթացքում Անդրեն ասաց՝ արի´ այս երգը երգիչ-երգչուհիներով միասնաբար երգենք: Գաղափարն ինձ շատ ուրախացրեց: Նրանցից շատերին արդեն անձամբ ծանոթ էի: Շատ զգացվեցի, շատ հուզվեցի այս խմբակային կատարման համար: Նրանք իմ սիրված, հարգված երգիչ-երգչուհիներն էին, որոնց գործունեությանը հետևել էի տարիներ շարունակ: Իսկ հիմա ինձ համար քով քովի եկան իրենց հրաշալի ձայներով և ալբոմս պատվեցին:

Անդրեն իսկապես հոգով, սրտով նվիրվեց այս ամենին, իսկ Արա Գևորգյանը սիրով իր ստուդիայի դռները բացեց մեր առաջ: Բոլորից շատ շնորհակալ եմ:

– Կցանկանայի, որ խոսեիր երիտասարդ երաժիշտ Պեդրոյի մասին:

– Պեդրոն ազգությամբ հույն է  և իմ շատ լավ ընկերն է: Իմ երկու ալբոմներում էլ իր վոկալներով մասնակցություն է բերել: Միևնույն ժամանակ արձանագրություններուս ժամանակ էլ իմ կողքին էր: Նա շատ լավ երաժիշտ է:

–  Ալբոմում տեղ է գտել նաև «Ավետյաց երկիր» երգի ռեմիքս տարբերակը, որը քեզ նվիրել է թուրք երաժիշտ Մերջան Դեդեն: Խնդրեմ՝ այս մասին:

– Մերջան Դեդեն «Սիպիլ» ալբոմում «Կիլիկիա» երգի նվագակցողն էր և «Իմ անուշ տավիղ» երգի ռեմիքս տարբերակն էր ինձ նվիրել: Նա աշխարհով մեկ շրջող, շատ զբաղված մեկը լինելով հանդերձ՝ միշտ իմ կողքին է: Նա իմ կյանքում շատ կարևոր տեղ մը ունի: Մեր ծանոթության առաջին օրը նա ասաց. «Դուք՝ հայերդ, հրաշալի երաժշտություն ունեք, կուզեմ, որ մարդիկ ավելի շատ ճանաչեն ձեր հրաշալի մեղեդիները»: Եվ ինձ հրավիրեց մասնակցելու Փարիզի տաճարում կայանալիք համերգին և հայկական երաժշտությունը օտարներին ծանոթացնելու պատճառ դարձավ: Ես ինձ շատ բախտավոր կը զգամ, որ ոչ միայն որպես երաժիշտ, այլև մարդկային կողմե հրաշալի տվյալներ ունեցող այս անձը «Սեր» ալբոմիս մեջ էլ սիրահոժար մաս կազմեց:

– Ալբոմում զետեղված 12 երգերից 11-ը  հայերեն են, մեկը՝ Ma Hollema (Մինչև ե՞րբ) արամեերեն լեզվով է: Այս երգի մասին ի՞նչ կարող ես պատմել: Ինչի՞ մասին է այն:

– Շատ մեծ փափագ ունեցա արամեերեն բառերով երգ երգել երկրորդ ալբոմիս մեջ, որովհետև այս լեզուն Հիսուս Քրիստոսի լեզուն է: Այս լեզուն, որ այսօր կորստյան վտանգի առաջ է, Թուրքիայում նախկինում ոչ մեկի ալբոմում տեղ չի գրավել: Թուրքիայում շատ քչերն են տիրապետում արամեերեն լեզվին: Ի վերջո, ընկերոջս միջոցով ծանոթացա ասորի Թումա Սելիքի հետ, ով և երգի բառերը գրեց: Երգը հայերի դաժան օրերի մասին խորհելով է գրված… Երգի բառերը այսպես են…

…Մի առավոտ արթնացա,

Եվ երբ շուրջս նայեցի, տեսա՝

Ո´չ արևն էր ծագել, ո´չ ձյուներն էին հալվել,

Ամենուրեք կը տիրեր ձմռան տխուր մթություն,

Ո´չ իմ սիրելիները, ո´չ էլ զիս սիրողներն իմ շուրջը չէին:

Երբ առանձին կը վազեի ճանապարհների մեջ,

Նկատեցի, թե հույսերիս արգելք եմ հանդիսացել:

Տեսնելով, որ իզուր է այս սպասումը,

Սիրով զինված՝ ճամփա ելա…

 

– Ալբոմ թողարկելը հսկայական աշխատանք է, որը իրականություն է դառնում շատ ու շատ մարդկանց շնորհիվ, որոնցից շատերի անունները շատ հաճախ անհայտ են մնում: Կցանկանայի, որ այդ մարդկանց մասին խոսեիր. ովքե՞ր են օգնել, հովանավորել, աջակցել քեզ:

– Սիրելի´ Լուսինե, երբ որ այս ճանապարհին քայլ նետեցի, հասկացա, որ այն թե´ նյութական և թե´ բարոյական շատ մեծ դժվարություններ ունի: Առաջին ալբոմս իմ կարելիություններով արեցի: Ու մարդիկ կը սպասեին, որ այսքան արձագանքից հետո անպայման երկրորդ ալբոմս ձայնագրեմ: Երկրորդ ալբոմս շատ ավելի պատասխանատու պետք է լիներ ինձ համար: Շուրջս մարդիկ ասում էին. «Սիպի´լ, մինչև ե՞րբ կարող ես այս ծախսերի միջից դուրս գալ»:

Ես շատ ամաչկոտ անձ մըն եմ, անգամ ընտանիքիցս որևէ բան պահանջող մարդ չեմ եղել: Ճիշտ այս պարագաներու մասին խորհելու ժամանակ Աստված իմ առաջ հրաշալի մարդ բերեց, մարդկային հրաշալի տվյալներով լեցուն մեկին… Այդ անձի անունը Հերման Հինթիրյան է: Նա առաջարկեց իմ հովանավորը լինել: «Սեր» ալբոմի բոլոր ծախսերը նա է հոգացել: Նրան իսկապես շատ երախտապարտ եմ, Աստված շատ ավելիով նրան թող վարձահատույց լինի: Աշխարհի վրա այսպիսի մարդկանց գոյությունը շատ մեծ բախտավորություն է, իսկ հանդիպելն՝ ավելի մեծ բախտավորություն:

Հետո  բախտավորություն ունեցա ծանոթանալու աշխարհահռչակ ոսկերիչ Ավետիս Քենդիրի հետ: Նա էլ կարծես հրաշքի պես երևույթ է: Նկարահանումների ժամանակ կը փափագեի, որ ծանոթ հայ ոսկերիչի զարդեր գործածեմ: «Ո՞ւմ մոտ կարող ենք երթալ, ո՞վ մեզ արդյոք կօգնի»,-հարցնում էի ընկերներիս: Եվ շատ պատահական՝ Ավետիս Քենդիրեից իմ ձայնը և գործունեությունը գնահատող նամակ ստացա:

Այնքան համեստ ու բարի մարդ է, որ Ելիզաբեթ Թագուհու, աշխարհահռչակ դերասանուհիների և երգչուհիների համար զարդեր պատրաստելով հանդերձ՝ ինձ գրել էր. «Ես ալ բաներ մը անել կը ջանամ. երբ որ հարմար գտնես՝ քեզ իմ գործերը ցույց տալ կցանկանամ»: Այսքան պատահական բան կլինի՞…

Իր նամակն ինձ շատ ուրախացրեց: Հետո պատմեցի ալբոմիս մասին և ասացի, որ շատ կը փափագեմ նկարահանումների ժամանակ իր զարդերը գործածել: Ամենայն սիրով ընդունեց խնդրանքս և ասաց՝  ո´րը ցանկանաս, կարող ես գործածել: Այդքան թանկարժեք զարդեր կրել ես ամաչեցի, բայց նա ինձ սիրով տրամադրեց:

Նկարահանումների ժամանակ օգտագործված հագուստների հեղինակը Թուրքիայում և արտասահմանում շատ ճանաչված, նշանավոր դիզայներ Արզու Կապրոլին է: Լուսանկարիչ Յասար Սարասօղլուի միջոցով ենք նրա հետ կապ հաստատել, և նրա հագուստները կրելու բախտ մը ունեցա:  Բոլորից սրտանց շնորհակալ եմ:

– Ալբոմում ընդգրկված «Այս գիշեր» երգի հիման վրա նկարահանվել է տեսահոլովակ: Ե՞րբ այն պատրաստ կլինի և որտե՞ղ կհեռարձակվի:

– Հովհաննես Շիրազի խոսքերով և Մաժակ Թոշիկյանի երաժշտությամբ «Այս գիշեր» երգի տեսահոլովակն արդեն պատրաստ է: Շուտով պետք է փոխանցենք հեռուստաընկերություններին:

– Զրույցի վերջում ի՞նչ կցանկանայիր մաղթել քո հանդիսատեսին: Առաջիկայում  ի՞նչ անակնկալներ կարող է սպասել իր սիրելի երգչուհուց:

– Իմ սիրելի հանդիսատեսին կը ցանկանամ խաղաղություն, սեր և միություն: Կը մաղթեմ, որ բոլորն իրենց երազանքների հետևից երթան, լինեն միշտ առողջ ու երջանիկ:

Անակնկալների մասին այս պահին ոչինչ չեմ կարող ասել: Ես ալ ձեզ հետ միասին պետք է տեսնեմ, թե կյանքն ինչ անակնկալների պետք է արժանի անի ինձ…

Լուսինե´ ջան, քո միջոցով բոլոր համակիրներուս սրտանց սեր և համբույրներս կը փոխանցեմ:

– Սիրելի´ Սիպիլ, մենք նույնպես մեր սերը, հպարտությունն ու երախտագիտությունն ենք քեզ փոխանցում: Եվ սպասում ենք նոր երգերի ու անակնկալների…

 

Զրուցեց Լուսինե Աբրահամյանը

Scroll Up