Հայոց ցեղասպանության 103-րդ տարելիցին նվիրված միջոցառումներ Ֆրանսիայում

Ապրիլի 20-24-ը Փարիզում և Ֆրանսիայի այլ քաղաքներում անցկացվեցին Հայոց ցեղասպանության զոհերի հիշատակին նվիրված բազմաթիվ ոգեկոչման միջոցառումներ:

Ապրիլի 20-ին Ֆրանսիայի Էվրո քաղաքում տեղի ունեցավ Հայոց ցեղասպանության անմեղ զոհերի հիշատակին նվիրված հուշակոթողի պաշտոնական բացման արարողությունը: Ներկա էին Էվրոյի քաղաքապետ Գի Լեֆրան, ՀՀ դեսպանության դեսպանորդ Լևոն Ամիրջանյանը, քաղաքային խորհրդի անդամներ, ֆրանսահայեր:

Ապրիլի 21-ին հիշատակի միջոցառում անցկացվեց Փարիզի մերձակա Մեդոն քաղաքում: Միջոցառմանը ներկա էին և ելույթներով հանդես եկան Մեդոնի քաղաքապետ Դենիս Լարժերոն, Սենատոր Էրվե Մարսելը, Ֆրանսիայում Արցախի ներկայացուցիչ Հովհաննես Գևորգյանը, Ֆրանսիայում ՀՀ դեսպանության աշխատակիցներ, համայնքային կառույցների ներկայացուցիչներ, ֆրանսահայեր:

Ապրիլի 21-ին հայոց նահատակների հիշատակին հարգանքի տուրք մատուցվեց Փարիզի Հաղթական կամարի ներքո: Ֆրանսահայ նախկին ռազմիկների և դիմադրողականների միության կազմակերպմամբ՝ ՀՀ դեսպանության ներկայացուցիչների և ֆրանսիացի բազմաթիվ քաղաքական գործիչների գլխավորությամբ տեղի ունեցավ բազմամարդ քայլերթ Փարիզի Ելիսեյան դաշտեր կենտրոնական պողոտայով, որին հաջորդեց ծաղկեպսակների զետեղման արարողություն: Այնուհետև Ֆրանսիայի զինված ուժերի նվագախմբի կատարմամբ Հայաստանի և Ֆրանսիայի օրհներգերի ներքո տեղի ունեցավ Հաղթական կամարի հավերժական կրակի բորբոքման հանդիսավոր արարողությունը:

Ապրիլի 22-ին Փարիզի Աստվածամոր տաճարում մատուցվեց Սուրբ Պատարագ ի հիշատակ Հայոց Ցեղասպանության զոհերի: Պատարագին ներկա էին Ֆրանսիայում ՀՀ դեսպան Վիգեն Չիտեչյանը, Ֆրանսիայում, Արցախի ներկայացուցիչ Հովհաննես Գևորգյանը, Օ-դը-Սեն դեպարտամենտի խորհրդի նախագահ Պատրիկ Դևեջյանը, համայնքային կառույցների ներկայացուցիչներ, բազմաթիվ ֆրանսահայեր:

Ապրիլի 24-ին Փարիզի քաղաքապետարանի հանդիսությունների սրահում քաղաքապետ Անն Իդալգոյի անունից տեղի ունեցավ ընդունելություն նվիրված Հայոց ցեղասպանության 103-րդ տարելիցին: Ելույթներով հանդես եկան Փարիզի քաղաքապետը, Ֆրանսիայում ՀՀ դեսպան Վիգեն Չիտեչյանը, Ֆրանսահայ կազմակերպությունների համակարգող խորհրդի համանախագահներ Մուրադ Փափազյանը և Արա Թորանյանը: Հիշատակի միջոցառմանը մասնակցեցին Փարիզի քաղաքային իշխանությունների ներկայացուցիչներ, պատգամավորներ` Ֆրանսիայի Ազգային Ժողովի Ֆրանսիա-Հայաստան բարեկամական խմբի նախագահ Ժակ Մարիլոսյանի գլխավորությամբ, սենատորներ, բազմաթիվ քաղաքական և մշակութային գործիչներ, հարյուրավոր ֆրանսիացիներ և ֆրանսահայեր:

Դեսպան Չիտեչյանն իր ելույթում անդրադարձավ Հայոց ցեղասպանության ժխտողականության դատապարտման և քրեականացման հարցին, ինչը կարևոր է ոչ միայն հայության համար, այլև ցեղասպանությունների կանխարգելման և մարդկության դեմ հանցագործությունների միջազգային պայքարի տեսանկյունից:

Դեսպանը նշեց, որ Հայաստանը ցեղասպանությունների և մարդկության դեմ ոճիրների կանխարգելման միջազգային պայքարի առաջամարտիկ է՝ հիշատակելով Երևանում անցկացվող Ցեղասպանության հանցագործության դեմ Գլոբալ ֆորումները և ՄԱԿ-ի Մարդու իրավունքների խորհրդում նախաձեռնվող բանաձևերը: Դեսպանն անդրադարձավ նաև 2009թ. Ցյուրիխում ստորագրված հայ-թուրքական արձանագրությունների չեղարկմանը:

Ապրիլի 24-ին Փարիզի Սուրբ Հովհաննես հայկական եկեղեցում մատուցվեց Սուրբ Պատարագ ի հիշատակ Հայոց ցեղասպանության զոհերի: Պատարագին ներկա էին Ֆրանսիայում ՀՀ դեսպանության ներկայացուցիչները, Ֆրանսիայում Արցախի ներկայացուցիչ Հովհաննես Գևորգյանը, Ֆրանսիայի Ազգային Ժողովի Ֆրանսիա-Հայաստան բարեկամական խմբի նախագահ Ժակ Մարիլոսյանը, համայնքային կառույցների ներկայացուցիչներ, բազմաթիվ ֆրանսահայեր:

Ապրիլի 24-ին Փարիզի Երևանյան պուրակում՝ Ֆրանսահայ կազմակերպությունների համակարգող խորհրդի կոչով կայացավ Հայոց ցեղասպանության 103-րդ տարելիցին նվիրված բազմահազարանոց հավաք, որում Ֆրանսիայի Հանրապետության նախագահին ներկայացնում էր Պետական նախարար, Բնապահպանական և համերաշխ անցման նախարար Նիկոլա Ուլոն:

Հավաքին ներկա էին Ֆրանսիայում Հայաստանի դեսպան Վիգեն Չիտեչյանը, Փարիզի քաղաքապետ Անն Իդալգոն, Ֆրանսիայի Ազգային Ժողովի Ֆրանսիա-Հայաստան բարեկամական խմբի նախագահ Ժակ Մարիլոսյանը, Փարիզի 8-րդ շրջանի քաղաքապետ Ժանն դը Օտսերը, Ֆրանսիայի քաղաքական ուժերի ներկայացուցիչներ, տարբեր քաղաքներից ժամանած քաղաքապետեր, ֆրանսահայ կառույցների ղեկավարներ: Ելույթներով հանդես եկան Փարիզի քաղաքապետ Անն Իդալգոն, Ֆրանսահայ կազմակերպությունների համակարգող խորհրդի համանախագահներ Մուրադ Փափազյանը և Արա Թորանյանը:

Հավաքի պաշտոնական մասի ավարտից հետո հազարավոր մասնակիցները Հայոց ցեղասպանության ժխտողականության դեմ պայքարի և Լեռնային Ղարաբաղի ժողովրդին աջակցության կոչերով քայլերթ անցկացրեցին Ելիսեյան դաշտեր պողոտայով:

Ֆրանսահայ կառույցների կոչով՝ ոգեկոչման բազմամարդ միջոցառումներ տեղի ունեցան Ֆրանսիայի տարբեր քաղաքներում` Մարսելում, Լիոնում, Լիլայում, Պլեսի Ռոբինսոնում, Լը Մանում, Վալանսում, Վիլորբանում, Բու-Բել-Էրում, Շարանտոն-լը-Պոնում և այլ քաղաքներում՝ Ֆրանսիայի պետական և տեղական մարմինների և ՀՀ դիվանագետների մասնակցությամբ:

Հայոց ցեղասպանության 103-րդ տարելիցին նվիրված հիշատակի արարողությունները Ֆրանսիայում կշարունակվեն մինչև մայիսի կեսերը:

Scroll Up