«Դանիելն ու Արման-Օնիկը «Արի տուն» ծրագրից շատ գոհ են մնացել». հյուրընկալ ընտանիք

%d5%a1%d6%80%d5%ab-%d5%bf%d5%b8%d6%82%d5%b62

«ՀՀ սփյուռքի նախարարության հայրենաճանաչության «Արի տուն» ծրագրի շրջանակներում 2015 թվականին առաջին անգամ աղջիկս Վրաստանից եկած երկու տղայի էր հյուրընկալել, իսկ անցյալ տարի երկու տղայի` Բուլղարիայից` Արման-Օնիկին և ՌԴ-ից`Դանիելին, ես որոշեցի հյուրընկալել»,Հայերն այսօր»-ի հետ զրույցում ասաց Վերա Քալաշյանը և հավելեց, որ ջերմորեն, հարազատ թոռների նման է նրանց ընդունել: Տաս օրերի ընթացքում բնակարանում այնպիսի մթնոլորտ է ստեղծել, որպեսզի տղաներն իրենց հայկական միջավայրում զգային, կապվեին իրենց արմատներին:

Տիկին Վերայի թոռնիկը 15 տարեկան է և հեշտությամբ է մտերմացել հասակակիցների հետ. միասին իջել են բակ՝ խաղալու, լողավազան են գնացել:

Հարցին, թե ինչպես կբնութագրի երիտասարդներին, Վերա Քալաշյանն ասաց, որ Արման-Օնիկը ժպտադեմ, պայծառ տղա է, հիացել է նրա՝ Հայաստանի, հայ ժողովրդի հանդեպ ունեցած հետաքրքրությունից, խելացի մտածելակերպից, իսկ Դանիելը մի փոքր ներփակ, ամաչկոտ անձնավորություն է եղել, բայց բոլոր նպաստավոր պայմանները ստեղծել են, որ նա ևս մտերմանա ընտանիքի հետ: Ծրագրի ավարտից հետո մշտական կապի մեջ են գտնվում:

Դանիելն ու Արման-Օնիկը շատ գոհ են մնացել «Արի տուն» ծրագրից: Ամեն առավոտ ոգևորությամբ են արթնացել և ուրախ-զվարթ շրջագայությունների գնացել, իսկ տուն վերադառնալով՝ ընտանիքի անդամների հետ կիսվել են իրենց տպավորություններով, թե ինչ տեսարժան վայրեր են այցելել ու ինչպիսի մարդկանց հանդիպել: Աննկարագրելի է եղել նրանց ուրախությունը Ծաղկաձորում անցկացրած ճամաբարային օրերից, որոնց նաև տիկին Վերայի թոռնիկն է մասնակցել: Այդ 4 օրերի ընթացքում տղաներն ավելի են կապվել միմյանց և հրաժեշտի ժամանակ մեծ դժվարությամբ, արցունքոտ աչքերով են բաժանվել:

«Սփյուռքահայ այն երիտասարդները, ովքեր ցանկանում են Հայաստան գալ՝ մոտիկից ծանոթանալու հայրենիքի ավանդույթներին, շփվելու հայրենակիցների հետ, տեսնելու պատմամշակութային վայրերն ու չհեռանալու իրենց արմատներից, ապա անպայման պետք է մասնակցեն ՀՀ սփյուռքի նախարարության «Արի տուն» ծրագրին, որը այդ ամենին հասնելու բոլոր հնարավորությունները տալիս է»,-զրույցն ամփոփեց Վերա Քալաշյանը:

Գևորգ  Չիչյան

%d5%a1%d6%80%d5%ab-%d5%bf%d5%b8%d6%82%d5%b63