ՀՀ ՍՓՅՈՒՌՔԻ ՆԱԽԱՐԱՐՈՒԹՅՈՒՆԸ 5 ՏԱՐԵԿԱՆ Է

ՈՂՋՈˉՅՆ ՀՀ ՍՓԻՒՌՔԻ ՆԱԽԱՐԱՐՈՒԹԵԱՆ ՀՆԳԱՄԵԱԿԻՆ

Հայաստանի Հանրապետութեան, որպէս լիիրաւ անկախ եւ ինքնիշխան հանրապետութիւն, կայացումէն յետոյ  հարկ եղաւ բաւական երկար տարիներ սպասել, որպէսզի նախկին վարչակարգէն ժառանգ մնացած «Սփիւռքի հետ Մշակութային Կապի Կոմիտէն» հիմնովին վերափոխուի ու վերածուի  համայն աշխարհի մէջ ամէնէն ընդարձակ Սփիւռքը ունեցող համեմատաբար փոքր պետութեան մը վայել՝ տիպար կազմակերպութեամբ Նախարարութեան մը, որ հայկական Սփիւռքի բոլոր հարցերուն եւ հարցականներուն իրապէս գիտակից եւ սրտցաւօրէն մորմոքող մեծայարգ Նախարարուհի Տիկին Հրանոյշ Յակոբեանի եւ իր հմտալից վարչագիտութեան ներքեւ աշխուժօրէն գործող ընտրեալ աշխատակազմի մը գործակցութեամբ ծաւալեց յոյժ գնահատելի, նպատակասլաց ու հայրենանուէր գործունէութիւն՝ յատկապէս նորահաս ու երիտասարդ Սփիւռքահայ սերունդին ուղղեալ «Արի՛ տուն»  ծրագրով, որուն բազմապիսի եւ հեռահայեաց օգուտները բացայայտ են ամէն օտարաբնակ՝ այլեւ հայու ոգին պահպանած գիտակից մարդու աչքերուն:

Այս առաջնական կարեւորութեամբ ծրագրին առընթեր՝ զանազան փառատօներու, համաժողովներու, ծննդեան կամ մահուան հանգրուանային նշումներու, Սփիւռքէն հրաւիրուած կամ այցելու գեղարուեստական կազմերու կամ անհատ արուեստագէտներու հանդէպ գորովալիր ու քաջալերիչ ընդառաջումն ու ելոյթներու առիթով ցուցաբերուած կազմակերպչական նախանձելի որակը  արդար վարկ ու համբաւ ապահոված են արդէն ամբողջ հայաշխարհի տարածքին:

Մեզի՝ բանիմաց ու խղճամիտ Սփիւռքահայերուս կը մնայ ըստ արժանւոյն գնահատել այսքան կարճ շրջանի մը մէջ կատարուած աշխատանքը, եւ ամէն կերպով ու միջոցներով զօրակցել յառաջիկայ կատարուելիքներուն, միշտ լաւէն մեկնելով լաւագոյնին ձգտելու անկոտրում կամքով եւ առաջադրանքներով: Միշտ մնալով նոյն բարձրացող ուղեգծին վրայ, ազնիւ նպատակին ուղղեալ գործակցութեամբը պետական իշխանութեան հաւասարազօր բոլոր առընչակից մարմիններուն:

Բոլորանուէր սրտով կը շնորհաւորեմ Սփիւռքի Նախարարութեան հնգամեակը  եւ անսպառ ոյժ ու եռանդ կը մաղթեմ բոլոր զինուորեալ աշխատողներուն, գլխաւորութեամբ մեծարժէք մտաւորական եւ պետական գործիչ Տիկին Հրանոյշ Յակոբեանին:

ԶԱՐԵՀ ԽՐԱԽՈՒՆԻ

Պոլիս

Scroll Up