ՀՀ ՍՓՅՈՒՌՔԻ ՆԱԽԱՐԱՐՈՒԹՅՈՒՆԸ 5 ՏԱՐԵԿԱՆ Է

Թանկագի´ն ու Ազնուափա´յլ Տիկ. Հրանոյշ Յակոբեան

Ահաւասիկ Հայաստանի Սփիւռք Նախարարութիւնը կըտօնակատարէ իր հիմնարկութեան 5-րդ տարեդարձը։ Այս հանգրուանը տօնակատարութիւնն է նաեւ Սփիւռքի մէջ ապրող այն ամէն Հայորդիին, որ տէր կը կանգնի իր ինքնութեան ու իր ներկայութիւնը կըզգայ Հայաստանի պետական, ընկերային ու ազգային ապրումներուն մէջ։

Երբ կ’անդրադառնամ որ Սփիւռքի Նախարարութիւնը հասեր է իր գոյութեան հնգամեակին, նախ կը զարմանամ, որ որքա՜ն շուտ անցեր են այդ հինգ տարիները, յետոյ կը զարմանամ, որ Նախարարութիւնը որքա՜ն շատ գործ տեսեր է այդ հինգ տարիներու ընթացքին։ Կրնաք վստահ ըլլալ, որ մենք օրը օրին ուշադրութեամբ եւ ուրախութեամբ հետեւեցանք Նախարարութեան գործունէութեան, զգացինք, որ հիմա այս Նախարարութեան շնորհիւ մենք ալ մեր ձայնն ունինք Հայաստանի պետական համակարգին մէջ եւ զգացինք, որ հիմա այս նախարարութեան շնորհիւ Հայաստանի պետական համակարգը մեզի նկատմամբ ալ կը ցուցաբերէ հոգածութիւն ու գուրգուրանք։

Անկասկած Հայաստանի Հանրապետութեան բոլոր նախարարութիւնները նոյնքան սիրելի են մեզի համար ու բախտորոշ դեր կը կատարեն։ Բայց ՍփիւռքիՆախարարութիւնը կրկնակի սիրելի է ու կրկնակի բախտորոշ դեր կը կատարէ մեզի համար։ Եթէ չկար, պէտք է ստեղծուէր այս Նախարարութիւնը, եւ ահաւասիկ ստեղծուեցաւ։ Ստեղծուեցաւ, եւ անցնող հինգ տարիները փաստեցին, որ զուր տեղ չէր որ ստեղծուեցաւ։ Սփիւռքի Նախարարութեան շնորհիւ է, որ Սփիւռքի Հայ մարդը գտաւ այն կամուրջը, որ զինքը կը կապէր Հայոց Հայրենիքին։

Մեծայա´րգ Տիկին Հրանոյշ Յակոբեան, որպէս մէկը, որ գիտէ, թէ Դուք Սփիւռքի Նախարարութեան պաշտօնապէս հիմնումէն  ալ առաջ սիրտ ու աշխատանք սպառեցիք Սփիւռքահայութեան համար, սրտագինս կը շնորհաւորեմ Ձեր Նախարարութեան հնգամեակը եւ կը մաղթեմ, որ Ձեր բոլոր ձեռնարկները տան իրենց պտուղները, Սփիւռքն ու Հայաստանը աւելի ամուր կապերով կապուին իրարու, անոնք իրական իմաստով ամբողջականութիւն մը կազմեն,  եւ ամէն Հայ,  եթէ ոչ մարմնով, գոնէ հոգիով ու սրտով մասնակցի ձեր «Արի տուն» ծրագրին։

Բարի երթ՝ դէպի յառաջիկայ հանգրուաններ։

Յարգանքով՝

ՌՈՊԵՐ ՀԱՏՏԷՃԵԱՆ

Խմբագրապետ Պոլսոյ «Մարմարա» օրաթերթի

Իսթանպուլ

Scroll Up