ՀՀ ՍՓՅՈՒՌՔԻ ՆԱԽԱՐԱՐՈՒԹՅՈՒՆԸ 5 ՏԱՐԵԿԱՆ Է. «Պատիւ կը զգամ գործակցելու Սփիւռքի Նախարարութեան հետ…»

2008 թուականին հիմնուեցաւ ՀՀ Սփիւռքի նախարարութիւնը, որպէսզի իր խորհուրդներով օգտակար հանդիսանայ աշխարհացրիւ սփիւռքահայութեան մղած գոյատեւման պայքարին: Ազգային ինքնութեան պահպանման հարցի մէջ էականը հայոց լեզուի պահպանումն ու զարգացումն է: Ահա այս կարեւոր հարցի լուծմանն է նուիրուած Սփիւռքի նախարարութեան «Ամառնային դպրոց» ծրագիրը, որ հայոց լեզուի երկու ճիւղերէն արեւմտահայերէնի պաշտպանութիւնը ստանձնել է որպէս վտանգուած լեզու, ըստ ԻՒՆԵՍԿՕ-ի տուեալներուն:

Ինչպէս գիտէք, խորհրդային ժամանակաշրջանին խիստ արժեզրկուած վիճակ ունէին արեւմտահայերէնն ու արեւմտահայ գրականութիւնը: Շատ գրողներու եւ բանաստեղծներու գործեր Հայաստանի մէջ հրատարակուելու հնարաւորութիւն չունէին: Նոյնիսկ Հայաստան ներգաղթած բանաստեղծներ, ինչպէս պոլսահայ նոր բանաստեղծութեան հիմնադիր եւ գլխաւոր դէմք Հայկազուն Գալուստեանը, նոյնպէս նոյն գրական դպրոցի հետեւորդ բանաստեղծներ Խաչիկ Ամիրեանը, Եդուարդ Աղամեանը, Վարդերես Գարակէօզեանը, Արսէն Ճանեանը չկարողացան նոյնիսկ մէկ բանաստեղծութիւն գրել ու հրատարակել Հայաստանի մէջ արեւմտահայերէնով, որ արգիլուած գրաւոր լեզուի էր վերածուած:

Հայաստանի անկախացման շնորհիւ է, որ հայերէնը դարձաւ երկրի պաշտօնական լեզուն, եւ արեւմտահայերէնը որոշ ազատութիւն վայելեց: Իսկ 2008 թ. ՀՀ Նախագահ Պրն. Սերժ Սարգիսեանի հրամանով ստեղծուեցաւ Սփիւռքի նախարարութիւնը, որպէսզի զբաղուի սփիւռքահայութեան հարցերով:

Գովելի է, որ Սփիւռքի նախարարութիւնը իր զանազան ձեռնարկներու գլուխը դասած է արեւմտահայերէնի պաշտպանութիւնը եւ «Ամառնային դպրոց»-ի նման դասընթացքներով, նաեւ Սփիւռքի համար պատրաստուող դասագրքերով կը սատարէ այս կարեւոր գործին: Բարեբախտաբար ՀՀ իշխանութիւնները կը գիտակցին արեւմտահայերէնը եւ արեւմտահայու տեսակը փրկելու ռազմավարական կարեւորութեան՝ Հայաստանի ապագային համար, եւ նեցուկ կը կանգնին Սփիւռքի Նախարարուհիին՝ Տիկին Հրանուշ Յակոբեանին:

Պատիւ կը զգամ գործակցելու Սփիւռքի Նախարարութեան հետ, «Ամառնային դպրոց»-ի մէջ ստանձնելով արեւմտահայերէնի դասընթացքը իմ հեղինակային (audiovisual) լսատեսողական մեթոտով:

Կը շնորհաւորեմ Սփիւռքի Նախարարութեան ստեղծման հնգամեայ տարեդարձը եւ յաջողութիւններով լեցուն նոր հնգամեակներ կը մաղթեմ «Ամառնային դպրոց» ծրագրին:

Դոկտ. Հիլտա Գալֆայեան-Փանոսեան

հիմնադիր եւ նախագահ

Փարիզի «Մաշտոց» Հայ Լեզուի Պաշտպանութեան Միութեան

Scroll Up