Խոտորջուր. Հայոց Պատմութեան Մէջ «Փոքրիկ Հռոմ»-ի Մասին Պատմող Գիրքը

«Խոտորջուր. կորսուած դրախտ» խորագիրը կրող գիրքը կը պատմէ Խոտորջուր գեղեցիկ երկրին եւ անոր բնակիչներուն մասին, որ 18-րդ դարուն կոչուած է «Փոքրիկ Հռոմ» անունով: Այս մասին կը հաղորդէ Armenian Reporter պարբերականը:

Գիրքը կեանքի կը կոչէ սովորոյթներն ու աւանդոյթները Խոտորջուրի հայերուն, որոնք դարեր շարունակ՝ իրենց հողի եւ ինքնութեան համար մաքառած են տարբեր արհաւիրքներու դէմ եւ ի վերջոյ Համաշխարհային առաջին պատերազմի տարիներուն արտաքսուած եւ բնաջնջուած են թրքական կառավարութեան կողմէ կազմակերպուած ցեղասպանութեան հետեւանքով:

«Էրզրումի հիւսիսային լեռնային հատուածին վրայ մեկուսացած հայ կաթոլիկներուն վերաբերող պահպանուած է ընդամէնը քանի մը լուսանկար եւ Մխիթարեան միաբանութեան հրապարակած այս յայտնի աշխատանքը»,- նշած է պատմաբան, «Հայոց Ցեղասպանութիւնը. ամբողջական պատմութիւնը» աշխատութեան հեղինակ Ռէյմոնտ Գէորգեան:

Այս յուշամատեանը բնօրինակի լրամշակուած եւ ամբողջական թարգմանութիւնն է:

Բնօրինակը գրուած է հոգեւոր հայրեր Յարութիւն Հուլունեան եւ Մաթեւոս Հաճեանի, թարգմանուած Վաչէ Ղազարեանի եւ խմբագրուած Արամ Արքունի եւ Վիքթորիա Ռուի կողմէ: Յառաջաբանի հեղինակն է Յովհան Սիմոնեանը:

Գիրքը կազմուած է 652 էջերէ, անիկա կը ներառէ նոր քարտէզներ, բարբառի ցանկ եւ այդ տարածաշրջանի մասին ճանապարհորդական ուղեցոյց, որ գրուած է Հայոց Ցեղասպանութիւնը վերապրածի որդիին կողմէ:

yerakouyn.com

Scroll Up