ՈՒՐՈՒԿՈՒԱՅԻ ԿԱՌԱՎԱՐՈՒԹԻիՆԸ ՊԱՇՏՕՆԱՊԷՍ ՅԱՅՏԱՐԱՐԵՑ ՀԱՅՈՑ ՑԵՂԱՍՊԱՆՈՒԹԵԱՆ ԹԱՆԳԱՐԱՆԻ ՄԸ ՍՏԵՂԾՈՒՄԸ

Երեկ՝ 17 Յուլիս 2013, մեր գաղութի տարեգրութեան մէջ արձանագրուեցաւ պատմական թուական մը ևս, երբ Ուրուկուայի նախագահական նստավայրի գլխաւոր հանդիսասրահին մէջ, մեծ թիւով գաղութիս անդամներու և հրաւիրեալներու ներկայութեան, որոնց մէջ ՀՀ Արժանթինի Ուրուկուայի և Չիլիի դեսպան Պր. Վահագն Մելիքեան, պատւոյ հիւպատոս Պր. Ռուբէն Աբրահամեան, ՀՅԴ-ի Բիւրոյի անդամ Մարիօ Նալպանտեան, յարանուանութեանց կրօնական պետերու, գլխաւորութեամբ առաջնորդ Գերշ. Տ. Յակոբ Արք Գըլընճեանի,  ծերակոյտական Ռաֆաէլ Միքելինի և պատգամաւոր Ռուբէն Մարթինէս Ուէլմօ, որոնք մղիչ ուժը հանդիսացան Ցեղասպանութեան թանգարան մը ստեղծելու բանաձևի վաւերացման ի խնդիր, զբօսաշրջիկութեան և երիտասարդական հարցերու նախարար Տիկ. Լիլիան Քէշիշեանի և այլ պաշտօնակատար անձինք։

Յաջորդաբար խօսք առին կրթութեան և մշակոյթի փոխ նախարար Պր. Օսգար Կոմէս, որ ընթերցեց պաշտօնական յայտարարութիւնը, Գերշ. Տ. Յակոբ Արք Գըլընճեան, ՀՀ դեսպան Պր. Վահագն Մելիքեան և կրթութեան ու մշակոյթի նախարար Պր. Ռիքարտօ Էրլիչ։  Բոլոր խօսք առնողներն ալ շեշտեցին՝ ըսելով, թէ ստեղծուելիք թանգարանը մեծ ներդրում մը պիտի հանդիսանայ անհանդուրժողւթեան, ժխտողականութեան և ատելութեան դէմ պայքարելու անհետաձգելի գործին մէջ։

Այս համարձակ յայտարարութեամբ  Ուրուկուայ պետութիւն և կառավարութիւն անգամ մը ևս ապացուցեցին, թէ իրենք չեն շեղած իրենց մարդու հիմնարար իրաւունքի սկզբունքէն, և վերահաստատելով իրենց յանձնառութիւնը՝ սատար հանդիսանալու Հայ Դատին և զօրավիգ կանգնելով անոր, որպէսզի իր վերջնական աւարտին հասնի ճշմարտութիւնն ու արդարութիւնը, որ խլուեցաւ հայութենէն 1915-ի ահաւոր Եղեռնի օրերուն։

Մեզի կը մնայ խորին երախտագիտութիւն յայտնել այս ասպնջական և հայասէր  երկրի իշխանութիւններուն, որոնք գիտակցելով Հայոց ցեղասպանութեան 100-ամեակի անժամանցելիութեանը, անոր նախօրէին նման քայլի մը դիմեցին։

Ուրուկուայը առաջինը հանդիսացաւ՝ ճանչնալով Հայոց ցեղասպանութեան փաստը 1965-ին և այսօր 2013-ին առաջին պետութիւնը կը հանդիսանայ, Հայաստանէն դուրս, Հայոց ցեղասպանութեան թանգարանի մը ստեղծումին մէջ։

Մարդու իրաւունքներու ռահվիրայ այս երկիրը, իր պետական, կառավարական և հասարակական կառոյցներով, դարձեալ առաջին գծի վրայ կը մնայ, ինչ կը վերաբերի հայութեան և Հայաստանի արդար դատին  սատարելու դիրքին մէջ, հաստատակամ և պինտ, հակառակ նորանոր և բոլոր տեսակի ճնշումներուն։

 

Կարօ Հէքիմեան

Մօնթէվիտէօ, Ուրուկուայ

Armenian Genocide Museum in Uruguay_1

Scroll Up