Հայտնի իրավաբան Արա Ագիշյանը 1988 թվականից Կալիֆորնիայում զբաղվում է մասնագիտական գործունեությամբ: Նա լիազորված է աշխատելու նահանգի բոլոր դատարաններում, ԱՄՆ 9-րդ շրջանային վճռաբեկ դատարանում և ԱՄՆ Գերագույն դատարանում: Ա.Ագիշյանը ղեկավարում է «Արա Ագիշյան իրավաբանական գրասենյակ» ընկերությունը, որն ունի մասնաճյուղեր Էնսինոյում, Սան Դիեգոյում եւ Սակրամենտոյում: Ա.Ագիշյանը Կալիֆորնիա նահանգի Փաստաբանների միության, ինչպես նաև Լոս Անջելեսի եւ Ամերիկայի Փաստաբանների միությունների անդամ է: Եղել է Լոս Անջելեսի Գերագույն դատարանի դատավոր: Իր մասնագիտական հաջող գործունեության համար արժանացել է մի շարք պատվոգրերի և ձեռք բերել լայն ճանաչում` կամավոր հիմունքներով մատուցած բազմաթիվ ծառայությունների համար:

2009թ. «Հայաստան» համահայկական հիմնադրամի ԱՄՆ արեւմտյան շրջանի տեղական մարմնի խորհուրդը Ա.Ագիշյանին միաձայն ընտրել է ատենապետի պաշտոնում:

Նա աչքի է ընկել նաեւ իր բազմամյա հայանպաստ հասարակական գործունեությամբ: 15 տարի եղել է Հոլիվուդի Արշակ Տիգրանյան դպրոցի հոգաբարձուների խորհրդի քարտուղար, ինչպես նաեւ Հայկական բարեգործական ընդհանուր միության Սան Ֆերնանդոյի մասնաճյուղի ատենապետ:

Նպատակ ունենալով աջակցել հայկական ուսումնասիրություններին` տեր եւ տիկին Ագիշյանները հովանավորել են հայոց լեզվի, հայ մշակույթի և պատմության մի շարք ծրագրեր Կալիֆորնիայի, Լոս Անջելեսի համալսարանում, Հարավային Կալիֆորնիայի համալսարանում, ինչպես նաեւ ԱՄՆ-ի եւ Կանադայի բազմաթիվ հայկական դպրոցներում: